Í síðustu viku voru óvenjulega margar árásir gerðar með drónum á rússnesku landsvæði. Talið er að drónarnir hafi verið frá Úkraínu. Sumir rússneskir fréttaskýrendur tala um að þetta geti verið upphafið að „nýjum fasa“ í stríðinu.

Atburðir síðustu viku benda til að úkraínskir drónar nái nú allt til stórborga á borð við Moskvu og St. Pétursborgar. En allt hófst þetta í Tuapse, við Svartahafið, þar sem eldur kom upp í olíuhreinsistöð. Síðan fréttist af drónum yfir Belgorod og Adygea í suðurhluta Rússlands. Í St. Pétursborg varð að loka Pulkovo flugvellinum vegna óþekktra hluta sem sáust þar á flugi. En það sem veldur líklega mestum áhyggjum hjá Kremlverjum er að dróni hrapaði nærri stórri gasstöð nærri höfuðborginni.

The Bell segir í umfjöllun um þetta að þessir atburðir geti ekki annað en valdið áhyggjum hjá Kremlverjum. Í fyrsta lagi sé um dróna af mismunandi tegundum að ræða og hafi þeir líklega verið sendir á loft frá mismunandi stöðum. Í öðru lagi sé drægi þeirra meiri en áður og því sé hugsanlega hægt að ráðast á skotmörk í Moskvu. Í þriðja lagi sé þetta í fyrsta sinn sem svo margar árásir hafi verið gerðar á nokkurn veginn sama tíma og það geri verkefni rússneska hersins enn erfiðari.

Margir telja að fyrrgreindir atburðir séu aðeins forsmekkurinn af því sem koma skal.