Guðmundur Ingi Guðbrandsson, félags- og vinnumarkaðsráðherra, hefur sett Ástráð Haraldsson, héraðsdómara, sem ríkissáttasemjara í yfirstandandi vinnudeilu Eflingar og Samtaka atvinnulífsins. Stjórn dómstólasýslunnar hefur samþykkt að veita Ástráði leyfi frá dómarastörfum og hefst leyfið nú þegar.
Með erindi til félags- og vinnumarkaðsráðuneytisins, dags. 13. febrúar 2023, óskaði Aðalsteinn Leifsson, ríkissáttasemjari, eftir því að víkja í yfirstandandi kjaradeilu Eflingar og Samtaka atvinnulífsins og hefur félags- og vinnumarkaðsráðherra ákveðið að verða við þeirri beiðni.
Aðalsteinn Leifsson gegnir eftir sem áður embætti ríkissáttasemjara. Störf Ástráðs Haraldssonar munu einvörðungu snúa að ofangreindri vinnudeilu.
Sólveig Anna Jónsdóttir formaður Eflingar lýsir í færslu á Facebook-síðu yfir ánægju sinni með valið:
„…er það í mínum huga sannarlega jákvætt að settur hafi verið nýr sáttasemjari yfir deiluna og lýsi ég ánægju með Ástráð Haraldsson í það embætti. Ég mun mæta ásamt samninganefnd okkar Eflingarfélaga til samningafundar um leið og boðað verður til hans. Ég trúi því að skipun nýs sáttasemjara geti orðið upphaf að nýjum og betri kafla í þessari löngu kjaradeilu, sem hefur snúist upp í að verða deila ekki bara um kaup og kjör heldur um sjálfan samningsréttinn, okkar heilagasta rétt. Ég treysti því að hann verði framvegis virtur.“
