Borgarfulltrúar Sjálfstæðisflokksins og Sósíalistaflokks Íslands hafa krafist þess í sameiningu að haldinn verði aukafundur í borgarstjórn Reykjavíkur í vikunni til að ræða málefni Strætó bs.
Kjartan Magnússon borgarfulltrúi Sjálfstæðisflokksins segir í samtali við DV að krafan sé sett fram í þeim tilgangi að ná fram umræðum og afgreiðslu á tillögum þessara flokka um mikilvæg málefni Strætó, sem eru aðkallandi um þessar mundir.
- Annars vegar er um að ræða tillögu Sjálfstæðisflokksins um að málefni Klapp-greiðslukerfisins verði rædd í borgarstjórn og að óháðu ráðgjafarfyrirtæki verði falið að gera úttekt á kerfinu og koma með tillögur til úrbóta. Hins vegar er um að ræða tillögu Sósíalistaflokks Íslands um að Reykjavíkurborg vinni gegn frekari útvistun hjá Strætó.
- Báðar tillögurnar voru á útsendri dagskrá fundar borgarstjórnar í gær, 7. febrúar. Þegar fundurinn hafði staðið í um sex klukkustundir en einungis þremur málum verið lokið á þeim tíma, kom tillaga frá forseta um að taka fjögur mál af dagskrá í þeim tilgangi að ljúka fundinum fyrir kvöldmatartíma. Tillagan var síðan samþykkt með atkvæðum meirihlutaflokkanna og voru málefni Strætó því ekkert rædd á fundinum í gær þrátt fyrir ærið tilefni.
- Borgarfulltrúar Sjálfstæðisflokksins mótmæltu þessum vinnubrögðum enda augljóst að fulltrúar meirihlutans töfðu fundinn vísvitandi í því skyni að koma í veg fyrir að þar færi fram umræða um málefni Strætó. Það hefur hingað til verið meginreglan í borgarstjórn Reykjavíkur að klára dagskrána, jafnvel þótt það þýði að fundir standi fram á kvöld. Í gær var fundi hins vegar lokið fyrir kvöldmat, greinilega til að koma í veg fyrir að þar færu fram óþægilegar umræður um málefni Strætó.
- Borgarfulltrúar Sjálfstæðisflokksins lögðu fram eftirfarandi bókun þegar fulltrúar meirihlutans tóku áðurnefnd mál af dagskrá:
,,Borgarfulltrúar Sjálfstæðisflokksins telja mikilvægt að umræður um Klapp-greiðslukerfi Strætó fari fram eins og dagskrá fundarins kveður á um. Um er að ræða mál, sem snýst um mikilvæga þjónustu við Reykvíkinga og varðar mikla fjárhagslega hagsmuni. Óviðunandi er að meirihlutinn dragi umræður í borgarstjórn vísvitandi á langinn og neiti að taka dagskrármál til umræðu í því skyni að losna við umræður um óþægileg mál, eins og hér er að gerast.“
- Umrædd ákvörðun meirihlutans brýtur í bága við ákvæði 27. greinar sveitarstjórnarlaga og 34. grein samþykktar um stjórn Reykjavíkurborgar, sem kveður á um þann rétt borgarfulltrúa, að tekið verði á dagskrá borgarstjórnarfundar hvert það málefni sem varðar hagsmuni sveitarfélagsins. Ákvörðun um að fella niður stóran hluta dagskrármála með því að takmarka fundartíma og ljúka fundi skyndilega getur ekki samrýmst áðurnefndu lagaákvæði.
- Strax eftir að dagskrártillaga meirihlutans hafði verið samþykkt í krafti meirihluta atkvæða, lögðu borgarfulltrúar Sjálfstæðisflokksins og Sósíalistaflokks Íslands til sameiginlega að haldinn yrði aukafundur borgarstjórnar í vikunni svo unnt yrði að taka fyrir áðurnefnd mál. Enn á eftir að boða til fundarins en hingað til hefur venjan verið sú að slíkir aukafundir eru haldnir eins skjótt og auðið er.
