Hinn þekkti fisksali og athafnamaður Kristján Berg, Fiskikóngurinn, hefur dregið sig í hlé frá störfum tímabundið vegna andlegra veikinda.
Hann greinir frá þessu í opinni færslu á Facebook í kvöld. Þar tekur hann fram að fyrirtæki hans gangi vel og fjölskyldan dafni en sjálfur er hann ekki eins og hann á að sér að vera:
„Árið byrjar glæsilega, en eitthvað er geðheilsan að stríða mér. Er búinn að vera slappur undanfarna mánuði og ekki alveg eins og ég er vanur að vera. Yfirleitt er èg fullur af orku og hugmyndum og hausinn virkur. En undanfarna 10-20 mánuði, þá hefur einhver skrúfa/ur verið lausar.“
Hann segist vera að vinna í sjálfum sér og muni koma til baka. Hann nýtur þjónustu góðs sálfræðings en biður um ábendingar um góðan geðlækni. Kristján tekur fram að hann sé ekki að biðja um vorkunn eða „læk“ á færsluna.
„Mikið álag og streita undanfarin ár er líklegasta skýringin, en þetta reddast, eins og allt hitt.
En fjölskyldan er í góðum málum. Fyrirtækin ganga vel, starfsfólkið mitt hefur verið súper flott og bara ótrúlegt að vera með þennan bakhjarl, fjölskyldu, vini og starfsfólk. Met það mikils.
Ég reyni mitt besta í starfi og leik à meðan, eða þangað til ég næ heilsunni 100%. Öll fyrirtækin verða opin og í rekstri og ég eitthvað á vappi í þeim áfram.“
