Faðirinn fylltist örvæntingu og reyndi að brjóta rúðuna en sterkt glerið lét ekki undan. Næsta skref var því að hringja í lögregluna.
Dagana á undan höfðu þau ekki náð sambandi við dóttur sína og því fóru þau heiman frá sér, þann 16. ágúst síðastliðinn, í München að heimili hennar í Ingolstadt. Þar var hún ekki en skömmu síðar fundu þau Mercedes bifreið hennar og sáu að dóttir þeirra var dáin.
Eða það héldu þau.
Málið tók nefnilega undarlega stefnu og er nú orðið eitt undarlegasta og umtalaðasta sakamál síðari tíma í Þýskalandi.
Lögreglan mætti á svæðið og opnaði bílinn. Þá komu efasemdir upp hjá foreldrunum, sem eru af þýsk/írönskum uppruna. Var þetta dóttir þeirra sem var í bílnum?
Þegar lögreglan hafði lokið vettvangsrannsókn sinni og líkið hafði verið krufið fengu þau svar við spurningunni. Það var ekki 23 ára dóttir þeirra sem hafði verið drepin með 55 hnífsstungum. Þetta var önnur 23 ára kona. Þýsk/alsírsk kona sem bjó í Eppingen, sem er um 200 kílómetra frá Ingolstadt, og hafði viðurværi sitt af því að blogga um eitt og annað er við kemur fallegu útliti.
Ekki gerði það málið minna athyglisvert að bloggarinn var svo lík dóttur fólksins að Þjóðverjar kalla málið nú „tvífaramorðið“.
Hjónin gátu andað léttar þegar í ljós kom að dóttir þeirra hafði ekki verið drepin. En það þýðir ekki að þau geti notið samvista við hana á næstunni. Hún fannst á lífi skömmu eftir að líkið fannst og var þá handtekin grunuð um að hafa myrt tvífara sinn.
Nú eru rúmar tvær vikur síðan líkið fannst en lögreglan er eiginlega engu nær um hvað snýr upp og niður í þessu dularfulla morðmáli. Þýskir fjölmiðlar segja þó að lögreglan vinni aðallega út frá tveimur kenningum.
Önnur þeirra tengist þeirri staðreynd að konurnar líkjast hvor annarri mjög mikið. Telur lögreglan því ekki útilokað að þýsk/íranska konan hafi viljað að fólk teldi hana látna. Með því að myrða konuna, sem líktist henni svo mikið, hafi hún eygt möguleika á að sleppa frá fjölskyldu sinni sem var að sögn ekki ánægð með að hún var búin að finna sér nýjan mann eftir skilnað.
Hin kenningin er að allt snúist þetta um öfundsýki. Gengur hún út á að báðar konurnar hafi haft áhuga á sama manninum og að hin handtekna hafi ákveðið að ryðja hinni úr vegi.
Samkvæmt upplýsingum frá heimildarmönnum, sem þýskir fjölmiðlar hafa rætt við, þá umgengust konurnar sama fólkið.
23 ára karlmaður frá Kósóvó hefur einnig verið handtekinn vegna málsins en lögreglan hefur ekki viljað skýra frá meintri aðkomu hans að málinu.
Hann og konan sitja nú í gæsluvarðhaldi.
