En á samfélagsmiðlum hefur umræðan breyst og nú er fólk farið að tala opinskátt um að hugsanlega gangi „hin sérstaka hernaðaraðgerð“ (eins og Pútín kallar stríðið) ekki eins vel og Pútín og hans fólk segir.
Matilde Kimer, fréttamaður Danska ríkisútvarpsins (DR) í málefnum Rússlands og Úkraínu, segir að marktæk breyting hafi orðið á orðræðunni á Internetinu en það sé einmitt þar sem flestir Rússar, undir fimmtugu, sæki sér fréttir. Á vef DR er haft eftir henni að margir þeirra, sem kalla má aðaláróðurssinnana, séu farnir að tala um stríðið á annan hátt en áður. Mikil umskipti hafi átt sér stað í umræðu um stríðið.
Áður hafi verið rætt um nauðsyn stríðsrekstursins en nú sé rætt um af hverju rússneski herinn nái ekki betri árangri en raun ber vitni.
Pútín var gagnrýndur á samfélagsmiðlum um helgina fyrir að hafa tekið þátt í hátíðarhöldum í tilefni af 875 ára afmæli Moskvu á sama tíma og rússneskir hermenn hafi beðið mikla ósigra á vígvellinum í Úkraínu.
Kimer sagði að í vinsælum spjallþáttum sé nú rætt um af hverju Rússar hafi ekki sigrað í stríðinu og af hverju þeir verði að endurskipuleggja hersveitir sínar. „Allir vita að það er vegna ósigurs en það segir enginn upphátt. Þess í stað er rætt um ástæðurnar fyrir að það gengur ekki svo vel hjá Rússum,“ sagði hún og bætti við að enn sé bannað og raunar hættulegt að gagnrýna Pútín beint í Rússlandi.
Hún sagði það slæm tíðindi fyrir Pútín að umræðan um stríðið sé nú að opnast í Rússlandi. Hann hafi sagt þjóð sinni „hin sérstaka hernaðaraðgerð“ hafi gengið eins og lagt var upp með. Enginn sé þó í vafa um að Rússar hafi gert mistök og beðið ósigra í stríðinu. „Þetta er því auðvitað slæm staða fyrir Pútín og það verður mjög áhugavert að sjá hvað hann gerir næst,“ sagði hún.
