Svo mikil eyðing hefur átt sér stað á hlutum Amazonfrumskógarins að hún hefur náð þeim punkti þar sem ekki verður aftur snúið og munu þessir hlutar hugsanlega aldrei jafna sig. Þetta eru niðurstöður nýrrar stórrar rannsóknar sem vísindamenn gerðu í samvinnu við samtök frumbyggja.

Í rannsókninni er komist að þeirri niðurstöðu að það sé ekki framtíðarsviðsmynd að komið sé að þeim punkti að ekki verði aftur snúið, það sé sú staða sem nú sé uppi á sumum svæðum skógarins. 90% af allri skógareyðingu eigi sér stað í Brasilíu og Bólivíu og nú séu eyðimerkur farnar að myndast í báðum löndum. The Guardian skýrir frá þessu.

Helstu ógnirnar sem steðja að skóginum eru skógarhögg, námuvinnsla, olíuvinnsla og landbúnaður.

Landbúnaður á sök á 84% af allri skógareyðingu og stærð þess lands sem hefur verið tekið undir landbúnað frá 1985 hefur þrefaldast.