Þetta er lömunarveiki. Eitt tilfelli hefur nú verið staðfest í New York og þess utan hafa merki um sjúkdóminn fundist í skólpi í sjö hverfum borgarinnar. Af þessum sökum er óttast að sjúkdómurinn hafi nú þegar breiðst út í stórborginni.
New York Times hefur eftir Mary T. Bassett, yfirmanni heilbrigðismála í New York ríki, að hætta sé á að mörg hundruð manns hafi smitast. „Út frá þeirri vitneskju sem við höfum um fyrri faraldra lömunarveiki verðum við að átta okkur á að fyrir hvert staðfest smit geta mörg hundruð til viðbótar verið smitaðir,“ sagði hún. Þetta gæti því verið toppurinn á ísjakanum.
Lömunarveiki leggst oftast á börn og af þeim sökum er bólusetning gegn lömunarveiki skylda í Bandaríkjunum. En í sumum hverfum New York er lítið eftirlit með að börn séu bólusett að sögn New York Times og því eru ekki öll börn bólusett.
Bassett hvetur alla fullorðna, ekki síst barnshafandi konur, börn og ungmenni til að láta bólusetja sig ef þau eru ekki bólusett.
