Á mánudaginn sagði Oleksiy Arestovych, ráðgjafi Volodomyr Zelenskyy, Úkraínuforseta, að úkraínsku hersveitunum hefði tekist að brjótast í gegnum fyrstu varnarlínu Rússa. Á hinn bóginn sagði rússneska fréttastofan RIA að gagnsókn Úkraínumanna „hefði algjörlega mistekist“.
Breska varnarmálaráðuneytið sagði í daglegri stöðuskýrslu sinni í gær að Úkraínumenn hafi hert stórskotaliðsárásir sínar á Rússa á mánudagsmorguninn en gat ekki staðfest hvernig gagnsóknin gengur.
Í stöðuskýrslu ráðuneytisins frá því í morgun kemur fram að Úkraínumönnum hafi orðið nokkuð ágengt og hafi ýtt varnarlínu Rússa aftur á nokkrum stöðum.
Í umfjöllun Sky News um málið kemur fram að Rússar hafi komið upp öflugum varnarlínum við borgina Kherson og það muni gera Úkraínumönnum erfitt fyrir. Úkraínumenn virðast hafa undirbúið sig vel undir gagnsóknina og fara að öllu með gát segir í umfjölluninni. Þeir forðist að gera sömu mistök og Rússar sem hugðust ná Kyiv á sitt vald með leifturhraða á fyrstu dögum stríðsins. Eins og kunnugt er mistókst það algjörlega og úr varð algjör sneypuför rússneska hersins sem varð að draga sig frá Kyiv.
Talið er að Rússar séu með 15.000 til 30.000 hermenn á norðurbakka árinnar Dnipro en Kherson stendur við hana. Úkraínumenn hafa lagt miklar áherslu á það að undanförnu að einangra þessar hersveitir með því að ráðast á birgðaflutningalínur þeirra og eyðileggja brýr yfir Dnipro. Verða Rússar nú að notast við flotbryggjur og eiga í erfiðleikum með að koma birgðum frá suðurbakkanum yfir á norðurbakkann.
Sean Bell, fyrrum marskálkur í breska flughernum, sagði í samtali við Sky News að til að aðgerð af þessu tagi sé árangursrík þurfi að koma óvinunum á óvart. Úkraínumenn hafi hótað árás vikum saman og því hafi Rússar haft tíma til að styrkja hersveitir sínar á svæðinu. Hann sagði að það muni væntanlega vinna með Úkraínumönnum að íbúar í Kherson vilja ekki hafa Rússa þar og þeir muni hugsanlega gera Rússum skráveifur.
Einnig hefur verið bent á að óvíst sé hversu mikill vilji rússneskra hermanna sé til að berjast fyrir yfirráðum yfir Kherson. Hugsanlegt sé að hersveitir þeirra muni eigi í erfiðleikum með að samhæfa aðgerðir sínar og einnig sé mórallinn meðal þeirra lélegur.
Kherson er mjög mikilvæg borg, hernaðarlega, pólitískt og efnahagslega. Hertaka hennar var fyrsti stóri sigur Rússa í stríðinu. Ef þeir missa hana í hendur Úkraínumanna verður það mikill ósigur fyrir þá.
Héraðið liggur að Krímskaga og sá sem hefur Kherson á sínu valdi hefur yfirráð yfir ferskvatnsbirgðum Krímskaga. Héraðið er rúmlega 100 km frá Odesa sem Úkraínumönnum hefur tekist að halda á sínu valdi til þessa.
Ef Úkraínumenn ná Kherson á sitt vald verður það mikill sigur fyrir þá, bæði hernaðarlega og ekki síður pólitískt. Þá væru nær engir Rússar eftir vestan við Dnipro. Úkraínu væri þá skipt í tvennt og Mykolaiv og Odesa og vesturhluti Úkraínu væri þá mun fjær stríðsrekstrinum en nú er. Bæði Mykolaiv og Odes eru mjög mikilvægar borgir efnahagslega og hernaðarlega séð.
Ed Arnold, sérfræðingur hjá hugveitunni RUSI, sagði í samtali við Sky News að Úkraínumenn geti með sigri í Kherson sýnt vestrænum bandamönnum sínum að þeir geti notað vopnin frá þeim með góðum árangri til að endurheimta hertekin svæði úr höndum Rússa. Ef þeim takist það ekki sé ekki útilokað að sum vestræn ríki dragi úr stuðningi við þá.
Dr Matthew Ford, sérfræðingur í alþjóðamálum hjá University of Sussex, sagði að ákveðin áhætta felist í því ef Úkraínumenn sigra í Kherson því það muni valda Rússum sálarkvöl. „Spurningin er, ef þeir tapa á vígvellinum, hvað mun Vladímír Pútín gera? Ef valið stendur á milli þess að skipt verði um stjórn í Rússlandi og notkunar kjarnorkuvopna þá er það tilfinning mín að hann muni gera hvað sem er til að halda völdum. Það felur í sér raunverulega hættu á stigmögnun,“ sagði hann.
