Staðsetning eldgossins sem hafið er í Merardölum á Reykjanesi virðist hagstæð. „Þetta er eiginlega nyrst í hrauninu sem kom upp í Geldingadölum í fyrra, þarna vestast í Merardölum og þarna var hraun búið að renna áður og það virðist bara opnast þarna rauf í því hrauni,“ segir Einar Hjörleifsson, náttúruvársérfræðingur á Veðurstofu Íslands, í viðtali við DV.
Einar segir of snemmt að svara því hvort þetta verði kraftmikið eða kraftlítið gos. „Það byrjar rólega og svo þurfum við að sjá hvernig það þróast.“
„Þetta er á mjög góðum stað til þess að gera, við erum að fylgjast með hvernig sprungan þróast, hvort hún geti mögulega opnast norðar. Við þurfum að sjá hvað hún verður stór þessi sprunga, það er erfitt að átta sig á því á vefmyndavélunum eins og er.“
Einar segir ekkert benda til þess að hraun úr þessu gosi gæti runnið yfir Reykjanesbraut. „Ekkert bendir til þess eins og er. Við getum samt ekki útilokað það strax. En ef rennslið heldur áfram eins og það er þá bendir ekkert til að það nálgist Reykjanesbraut að minnsta kosti í bráð,“ segir Einar.
