„Í sjálfstætt reknum grunnskólum borgarinnar eru þau skilyrði sett að þeir megi ekki greiða sér út arð. Hvers vegna gildir hið sama ekki um leikskóla?“ spyr Trausti Breiðfjörð Magnússon, borgarfulltrúi Sósíalistaflokksins, í aðsendri grein á Vísir.is.
Þar gerir hann að umtalsefni úttekt innri endurskoðunar á sjálfstætt starfandi leik- og grunnskólum var kynnt á fundi skóla- og frístundaráðs í vikunni en greinin ber heitið: „Borgin á ekki að vera að opna á viðskiptatækifæri með barnæskuna“
Hann segir ýmislegt hafa komið fram í úttektinni: „Það sem kom mest á óvart er að einkareknir leikskólar hafa heimildir til þess að greiða sér út arð, og það án neinna skilyrða,“ segir hann og bendur á að umtalsverður arður sé greiddur út til eigenda sem jafnframt eru á launaskrá hjá leikskólanum: „Peningur sem ætti að nýtast börnum er sogaður út.“
Sjá einnig: Leikskólinn Vinaminni greiddi út 65 milljónir í arðgreiðslur – Sælukot keypti íbúðarhús á Einarsnesi
Trausti setur alvarlega fyrirvara við arðgreiðslur einkarekinna leikskóla sem þar að auki njóta opinberra styrkja. „Hluti þeirra hefur á síðustu árum greitt sér út meira en 100 milljónir í arð samkvæmt skýrslunni. Það þýðir að í stað þess að fé sem borgin er að styðja leikskólanna með renni beint í leikskólastarfið er hluti þess að enda í vasa eigendanna. Hvernig erum við þarna að tryggja sem bestu gæði leikskólastarfs í borginni? Ég get ekki séð hvernig svo er.“
Hann segir þrjá leikskólanna hafa greitt út rúmlega 20 milljónir í arð á síðustu árum en einn hafa greitt sér út 65 milljónir á tveimur árum.
Eins og kemur fram í umfjöllun DV síðan fyrr í dag er það leikskólinn Vinaminni í Asparfelli.
Segir engin mörk á hömluleysinu
„Annar leikskóli keypti íbúðarhúsnæði sem ekki er vitað til hvaða nota er ætlað. Dæmi eru um að leikskólar séu að greiða sér út arð í bullandi taprekstri,“ segir Trausti en eins og DV fjallaði um þá er það leikskólinn Sælukot sem keypti íbúðarhús og Ársól sem Skólar ehf. reka greiddi út arð þrátt fyrir að vera með neikvætt eigið fé og stefna í gjaldþrot samkvæmt úttektinni.
„Útsvarinu okkar er ekki best borgið í að viðhalda arðgreiðslum og einhverju sem lítur út fyrir að vera íbúðabrask,“ segir Trausti. „Borgaryfirvöld leyfa þessu að viðgangast. Engin mörk virðast sett á hömluleysið.“
Vill börnin í fyrsta sæti
Þá segir Trausti að ein af aðaláherslum Sósíalista sé að börn eigi ekki að þurfa að borga fyrir þjónustu borgarinnar. „Það felur í sér að þau séu ekki rukkuð um leikskólagjöld. Með því að tryggja það komum við í veg fyrir að leikskólar geti sópað fé út úr starfinu og fært í vasa eigenda. Borgin á ekki að vera að niðurgreiða slíka starfsemi, heldur einfaldlega tryggja að það sé engin gjaldskrá. Við eigum öll að geta sammælst um það að börnin séu sett í fyrsta sæti og verið fullviss um að fé úr okkar sameiginlega sjóði sé að renna til barnanna og ekki neitt annað.“
