Fréttablaðið skýrir frá þessu í dag og segir að álitsgerðin hafi verið unnin í kjölfar kvörtunar Evu Hauksdóttur. Hún leitaði til embættisins eftir að móðir hennar, sem var til meðferðar á stofnuninni, lést.
Fréttablaðið segir að í álitsgerðinni séu gerðar margar athugasemdir við störf á stofnuninni og eru viðbrögðin við kvörtun Evu sögð „ófullnægjandi og ámælisverð“. Telur Landlæknir að um faglega vanrækslu og mistök hafi verið að ræða varðandi þá heilbrigðisþjónustu sem móðir Evu fékk, „þar sem endurteknum, alvarlegum, bráðum sjúkdómseinkennum var ýmist gefinn enginn eða ófullnægjandi gaumur þegar hún kvartaði endurtekið til HSS á síðustu árum ævinnar“.
Einnig er gerð athugasemd við ummæli læknisins, Skúla Tómasar Gunnlaugssonar, um ófullkomna skráningarmöguleika á meðferðartakmörkunum sem „stingi í stúf við klínískar leiðbeiningar um líknarmeðferð“.
Eins og fram kom á þriðjudaginn þá telur Almar Möller, verjandi Skúla, að matsgerðir sem voru gerðar að kröfu lögreglunnar séu með þeim hætti að líklega hætti lögreglan rannsókn málsins og felli mál Skúla niður. Skúli hefur legið undir grun um að hafa gripið til tilefnislausra lífslokameðferða.
„Ég er ekki hissa á því. Það er bara einn angi af þessu fúski. Það breytir því ekki að í máli móður minnar þá kemur fram í álitsgerð landlæknis að sú meðferð sem hún fékk hafi borið öll einkenni lífslokameðferðar,“ sagði Eva í samtali við DV á þriðjudaginn um ummæli Almars.
