Í myndbandi sem birt var klukkan 5 í nótt á samfélagsmiðlinum TikTok má sjá tvo fullbúna sérsveitarmenn hafa afskipti af ungum manni í rauðri úlpu í miðbæ Reykjavíkur. Annar sérsveitarmaðurinn heldur á skotvopni og miðar því á unga manninn sem furðar sig á þessum viðbúnaði sérsveitarinnar og baðar út örmum.
„Ég er eini svarti gæjinn hérna,“ heyrist ungi maðurinn segja í myndbandinu.
Þá sést annar ungur maður koma unga manninum í rauðu úlpunni til hjálpar en sá reynir einnig að ræða við sérsveitina. Þá mæta tveir óeinkennisklæddir lögreglumenn sem fjarlægja þann af vettvangi og segja honum að róa sig niður.
Sá sem birti myndbandið segir í athugasemdunum við það að sérsveitarmennirnir hafi gengið beint upp að unga manninum í rauðu úlpunni og byrjað að spyrja hann spurninga. „Þeir miðuðu leisurum á strákana sem eru að tala við lögguna. Þeir miðuðu hlöðnu skotvopni á stráka undir lögaldri.“
Ekki er víst hvenær myndbandið var tekið upp en í athugasemdum er fullyrt að það sé frá því í nótt.
Hér fyrir neðan má sjá myndbandið sem um ræðir:
@eysteinnbatson♬ original sound – Eysteinn Batson
Uppfært klukkan 16:20:
Lögreglan sendi út tilkynningu fyrr í dag þar sem málið var útskýrt nánar. Þar kemur fram að atvikið hafi átt sér stað á fimmta tímanum í nótt en þá barst lögreglunni tilkynning um vopnaðan mann í miðborginni. Tilkynningin var „metin trúverðug og tekin alverlega“.
„Vegfarandi sagðist hafa heyrt á tali tveggja manna sem áttu í einhverjum útistöðum og að annar þeirra sagðist vera vopnaður og skildi vegfarandinn það þannig að um væri að ræða skotvopn. Vegfarandinn var með greinargóða lýsingu á manninum sem átti að hafa vopnið undir höndum,“ segir í tilkynningu lögreglunnar.
Lögreglan segir að brugðist hafi verið strax við samkvæmt verklagi og að það felist meðal annars í því að kalla til vakthafandi lögreglumenn hjá sérsveit ríkislögreglustjóra. „Fljótlega var maðurinn sem leitað var að staðsettur og höfðu lögreglumenn úr sérsveit afskipti af honum. Sá reyndist vopnlaus en í samtali við lögreglu viðurkenndi maðurinn að hafa látið þessi orð falla um vopnaburð í samskiptum við annan mann skömmu áður. Enginn var handtekinn vegna þessa.“
Haft var samband við forráðamann unga mannsins þar sem hann er undir 18 ára aldri.
Í tilkynningunni er sérstaklega tekið fram að skotvopnið sem lögreglumaðurinn heldur á er svokölluð höggboltabyssa. „Hún er í sama valdbeitingarstigi og lögreglukylfa,“ segir lögreglan.
