Maður á fimmtugssaldri hefur verið ákærður fyrir sérstaklega hættulega líkamsárás sem átti sér stað þann 6. ágúst árið 2019, á bifreiðastæði í Eyjabakka í Breiðholtinu.

Er hann sagður hafa skorið mann í efri hluta hægri handleggs, með þeim afleiðingum að þolandinn hlaut djúpan, 10-15 cm langan skurð þar sem þríhöfði fór í sundur og lá skurður djúpt undir vöðva.

Málið verður þingfest fyrir Héraðsdómi Reykjavíkur þann 27. apríl.

Maðurinn á langan sakaferil að baki og á þeim lista er önnur hnífstunguárás. Árið 2009 var hann sakfelldur fyrir að hafa stungið hálfbróður sinn með hnífi í bakið og öxlina. Árásin átti sér stað á almannafæri, við Hlemmtorg, og komu vegfarendur þolandanum þá til hjálpar en árásarmaðurinn stökk á flótta. Hann var síðan handtekinn niðri á Vatnsstíg um klukkutíma eftir árásina.

Fékk hann fimm ára fangelsi fyrir þessa alvarlegu árás en bróðir hans þurfti að dveljast á spítala eftir árásina sem hann þó lifði af. Dóminn um þetta mál má lesa hér.