Ómar Már Jónsson, oddviti Miðflokksins fyrir komandi borgarstjórnarkosningar, lenti í hörðum árekstri á gatnamótum Kringlumýrarbrautar og Miklabrautar í gær. Hann var á leiðinni í fermingarveislu ásamt eiginkonu sinni þegar slysið varð en það gerðist með þeim hætti að Ómar Már hægði á sér þegar að umferðin stöðvaðist vegna umferðarljósa en þá kom ökumaður aðvífandi og klessti á fullum krafti aftan á bíl oddvitans.
„Við erum enn í sjokki og eitthvað lemstruð eftir slysið. Afleiðingin af þessu var þriggja bíla árekstur og bíll þess sem keyrði aftan á okkur var mjög illa farinn,“ segir Ómar Már í samtali við DV. Hann segir að blessunarlega hafi þó ekki orðið alvarlegt slys. „Hugur okkar er hjá ungu konunni sem olli árekstrinum sem var í miklu áfalli eftir, með von um að hún jafni sig fljótt. Við vorum öll heppin í þetta skipti.“
Eins og áður segir er Ómar Már í framboði í borginni og því að mörgu að huga. Að hans mati verða umferðarmál veigamikið atriði fyrir komandi kosningar og þessvegna fékk Miðflokkurinn Ólaf Guðmundsson, eeinn helsta talsmann öryggismála í umferðinni til að halda kynningu um hvar helstu heimatilbúnu hætturnar liggja í umferðinni í höfuðborginni.
Fundurinn var haldinn á laugardaginn og þar benti umferðarsérfræðingurinn sérstaklega á gatnamótin Kringlumýrabraut/Miklubraut sem sérstaka hættu. Sólarhring síðar lenti oddvitinn svo í árekstri á nákvæmlega þessum stað.
„Þetta er ótrúleg tilviljun en á fundinum sagði Ólafur einmitt að það væri bara spurning um hver myndi lenda næst í slysi. Hann sagði orðrétt: ,,Verður það ég, þú Ómar eða börnin okkar”,“ segir Ómar Már. Það reyndist svo vera oddvitinn sjálfur.
Ómar Már segir að ábyrgðin á árekstrinum liggi hjá Reykjavíkurborg sem að fari með skipulagsvaldið og hafi ekkert aðhafst til þess að auka umferðaröryggi í Reykjavík. „Í fyrra voru um 200 manns sem að slösuðust eða létust í umferðinni á ári þar sem að engir ferðamenn voru á landinu vegna Covid-19. Ég hef reynslu af samtakamætti þjóðfélagsins þegar stór áföll eiga sér stað enda upplifði ég hvernig var brugðist við þegar snjóflóðið á Súðavík féll. Umferðarslysin eru að valda sorg og hörmungum hjá fjölmörgum fjölskyldum á hverju ári þó að það gerist hægar. Ég held að það væri þörf á sama samtakamætti til bæta umferðaröryggi,“ segir Ómar Már.
Hann bendir einnig á hvernig Íslendingum tókst að draga verulega úr slysum á sjó og líka í flugi með sameinuðu átaki, en sama hugarfar þurfi varðandi umferðaröryggi.
Hann segir ráðamenn umferðarmála vera allt of værukæra í að fyrirbyggja slys. „Þetta eru gatnamótin sem borgarstjórn hefur ekki tekist að tryggja umferðaöryggi á og á sínum tíma hafnaði því að setja þar mislæg gagnamót, byggt á forsendum umhverfissjónarmiða og arðsemismatsútreikninga. Ég myndi vilja að líf og heilsa fólks fengi stærri sess í því mati,“ segir Ómar Már.
