Tónlistarmaðurinn Júlí Heiðar Halldórsson og Fannar Freyr Magnússon, pródúsent, hafa skrifað undir samning við tónlistarrisann Sony um útgáfu á næstu plötu Júlí Heiðars sem ráðgert er að komi út í september á þessu ári.
„Ég er afar ánægður með að þetta samstarf við Sony hefur verið innsiglað. Þetta gerir það að verkum að ég og Fannar Freyr getum einbeitt okkur að því að semja og spila tónlist og vitað að aðrir þættir útgáfunnar eru í öruggum höndum fagmanna hjá Sony,“ segir Júlí Heiðar í samtali við Fókus.
Flest hefur gengið Júlí Heiðari í hag á árinu en nýjasta lagið úr hans smiðju, Ástin heldur vöku, hefur trónað á toppi íslenska listans undanfarnar fjórar vikur.
„Þessar viðtökur við laginu hafa farið fram úr mínum björtustu vonum og hafa átt sinn þátt í að ýmsar dyr hafa opnast fyrir mér undanfarin misseri. Ég taldi þessa vegferð með Sony vera mest spennandi og núna get ég í raun ekki beðið eftir að gefa út fleiri lög og síðan plötuna mín í haust. Það gefur manni aukinn kraft í öllu ferlinu að vita til þess að fólk kann að meta tónlistina mína,“ segir Júlí Heiðar, sem reiknar með því að næsta lag úr smiðju tvímenninganna, komi út í aprílmánuði.
