Arnþór Jónsson, stjórnarmaður SÁÁ og fyrrverandi formaður, hefur sagt sig úr stjórn samtakanna. Hann sendi tölvupóst þess efnis til 48 manna stjórnar samtakanna rétt í þessu. Framganga Arnþórs var kornið sem fyllti mælinn í gær hjá formannsframbjóðandanum Þóru Kristínu Ásgeirsdóttur sem ákvað að draga framboð sitt til baka eftir að Arnþór krafði hana svara um meint vændiskaup Kára Stefánssonar, yfirmanns hennar hjá Íslenskri erfðagreiningu. Í kjölfar þess að Þóra Kristín dró framboð sitt tilbaka sakaði fjölmiðlamaðurinn Frosti Logason, sem einnig er stjórnarmaður í SÁÁ, Arnþór um ofbeldishegðun.
Í afsagnarbréfi sínu til stjórnar fer Arnþór yfir atburðarás síðustu daga og kveðst hafa reynt að rækja skyldur sínar sem stjórnarmaður.
„Í því felst að fylgja eigin sannfæringu og spyrja spurninga – þótt þær séu óþægilegar. Í gær varð mér á að spyrja út í orðróm sem ég hafði heyrt, og er sterkur í samfélaginu. Í ljósi nýliðinna atburða taldi ég það skyldu mína að fá skýrt svar um að hann væri rangur, áður en gengið væri til formannskosninga. Taldi ég formannsefnið sama sinnis enda hafði hún áður farið mikinn í fjölmiðlum, ætlaði að stofna sannleiksnefnd og sagði m.a. í yfirlýsingu: „Nýkjörin stjórn þarf að setja sér siðareglur til að tryggja að það hafi sjálfkrafa í för með sér brottvísun úr öllum trúnaðarstöðum ef fólk innan samtakanna verður uppvíst að því að brjóta á veiku fólki eða misnota aðstöðu sína.“
Að mati Arnþórs þrífst ofbeldi í þrúgandi þögninni og að í hans huga hafi ekki verið hægt að fara í formannskosningar án þess að ávarpa þetta óþægilega mál og fá afgerandi svar.
„Taldi ég 48 manna stjórnina rétta vettvanginn til þess, enda höfðu áður komið fram ásakanir í fjölmiðlum um að stjórnarmenn hefðu vitað um vændiskaup fyrrverandi formanns en þagað yfir þeim. Að fylgjast með SÁÁ undanfarin misseri hefur verið eins og að horfa á bílslys spilað hægt. Sem stjórnarmaður hef ég fylgst með og reynt að grípa inn. Mér er það auðvitað löngu ljóst að skoðanir mínar eru óvinsælar en ég hef litið svo á að ég vinni fyrir SÁÁ – samtökin og sjúklingana – ekki stjórnina. Ég var kosinn til að vinna eftir minni sannfæringu og það hef ég gert.
Arnþór fer síðan yfir hvernig gagnrýni hans hafi verið kölluð ofbeldi og að hann hafi verið sakaður um að stjórna eftirliti Sjúkratrygginga Íslands, fjölmiðlaumræðu um SÁÁ og nú síðast sjálfri metoo-byltingunni.
„Stjórnarmenn hafa sagt á fundi að þeir vilji skjóta mig í hausinn. Þeir hafa logið upp á mig og fjölskyldu mína í blaðaviðtölum. Hingað til hef ég ekki nennt að svara þessu, en kannski er það tímabært: Ég stjórna ekki Sjúkratryggingum Íslands. Ég ber ekki ábyrgð á þeim vanda sem núverandi framkvæmdastjórn samtakanna er komin í. Ég veit ekkert um hvern Edda Falak er að tala í umræddu skjáskoti. Ég biðst afsökunar á að hafa sagt upphátt það sem aðrir voru að hvísla um sín á milli í samfélaginu.“
Arnþór bendir á að hann hafi unnið hjá SÁÁ í yfir 20 ár og gegnt formannsembættinu í sjö ár.
„Þegar ég lét af störfum höfðu samtökin aldrei staðið betur hvað varðar fjárhagslegt sjálfstæði, umgörð og aðbúnað. Það hefur gjörbreyst á stuttum tíma. Ég les í fjölmiðlum að Frosti Logason telur mig vera stærsta vandamál SÁÁ. Ef það er rétt hlýtur vandi SÁÁ að vera núna úr sögunni.“
