Öllum takmörkunum vegna Covid-19 verður aflétt á miðnætti næstkomandi föstudag. Þetta kemur fram í máli Willums Þórs Þórssonar heilbrigðisráðherra á blaðamannafundi ríkisstjórnarinnar.

Willum segir þá að verið sé að aflétta öllum takmörkunum bæði innanlands og á landamærunum. Hann segir afléttingar á landamærum vera miðaðar við tillögu Þórólfs Guðnasonar sóttvarnalæknis en að hann hafi boðið upp á nokkrar sviðsmyndir þegar kom að afléttingum innanlands.

Willum segir að valið hafi verið um að herða, aflétta öllu eða breyta engu. Þá segir hann að ástæðan fyrir því að ákveðið var að aflétta er sú að aðgerðir séu að skila litlu miðað við útbreiðslu veirunnar.

Hann segir fólki að gæta að sér í kringum viðkvæma hópa þar sem veiran er ekki farin. Hann nefnir til dæmis að fólk geti notað grímur og haldið fjarlægð.

Katrín Jakobsdóttir forsætisráðherra segir að full samstaða hafi verið um þessa ákvörðun innan ríkisstjórnarinnar. Þá segir hún að nú geti fólk endurheimt eðlilegt líf og að samfélagið sé komið á þann stað að hægt er að lifa með veirunni.

Dagurinn í dag minnir eflaust marga á sumardaginn í fyrra þegar tilkynnt var um afléttingu allra aðgerða, það var þó ekki endanlegt þar sem aðgerðir voru settar á aftur um haustið. Katrín vonar að það þurfi ekki að setja á aðgerðir að nýju en að það sé þó ekki útilokað að ný afbrigði komi fram sem þurfi að bregðast við.