Fremur lítið hefur verið um umferðaróhöpp á höfuðborgarsvæðinu í morgun þrátt fyrir mikla ófærð. Þetta segir Guðbrandur Sigurðsson, aðstoðaryfirlögregluþjónn á höfuðborgarsvæðinu, í samtali við DV. Nefnir hann þó þrjú umferðaróhöpp sem hafa orðið í morgun.

Eðli máls samkvæmt berast lögreglu ekki tilkynningar um fasta bíla nema slíkt eigi sér stað á stofnbrautum þannig að hamli umferð. Snemma í morgun var tilkynnt um fastan bíl á Suðurlandsvegi við Hafravatnsveg sem olli umferðarstöðvun. Síðan var útafakstur og ekið á ljósastaur á Reykjanesbraut við álverið í Straumsvík upp úr klukkan sjö. Engin slys urðu þar á fólki. Bílvelta varð við Breiðhöfða kl. 7:35 og að öllum líkindum urðu þar ekki slys á fólki en sjúkrabíll var sendur á vettvang.

En almennt hefur umferðin gengið mjög vel í morgun. „Sumir komast ekki að bílastæðunum heima hjá sér og þeir sem hafa tækifæri til hafa notað þessar veðuraðstæður til að vinna bara heima þannig að það hefur verið minni umferð en oft er og hún hefur gengið bærilega þó að víða sé þungfært í úthverfum,“ segir Guðbrandur.

Eftir hádegi hættir að sjóa og hlýnar í veðri en spáð er miklu hvassviðri, 15-23 metrum á sekúndu. Þetta getur haft mikil áhrif á færð og akstursskilyrði. „Miðað við þessa spá og allan þennan snjó þá má búast við miklum skafrenningi sem blindir sýn fólks mjög skyndilega þannig að fólk þarf að fara varlega og fara ekki af stað á vanbúnum ökutækjum og hreinsa vel allan snjó af þeim, af öllum rúðum og ljósabúnaði, þannig að þau sjái og sjáist. Og vera ekki á ferðinni nema nauðsynlegt sé,“ segir Guðbrandur og telur hann að meiri umferð verði síðdegis.

„Það má búast við meiri umferð síðdegis þar sem margir kunna að hafa seinkað för sinni í dag. Síðan eru allir á leiðinni heim seinni partinn. En það er ekki víst að veðuraðstæður verði betri þó að það sé ekki ofankoma heldur skafrennningur,“ segir Guðbrandur og bendir á að skafrenningurinn sé síst betri fyrir færð og akstursskilyrði.