Þetta kemur fram í Fréttablaðinu í dag en í gær var fjallað um gagnrýni á hendur Vegagerðinni fyrir að hafa ekki staðið sig hvað varðar snjómokstur síðustu daga.
Fréttablaðið hefur eftir Bergþóru að svo mikið hafi snjóað nærri Vík í Mýrdal á skömmum tíma að um sögulegt magn af snjó sé að ræða. Þá hafi það einnig valdið miklum vanda að sumir ökumenn hafi hunsað lokanir.
„Við vorum með menn sem unnu nánast öll jólin, auk fjölda verktaka. Þeir fara af stað á jóladag og þá er allt kolófært. Þarna voru meðal annars tveir vegheflar og jarðýta, þeir voru rétt að opna þegar önnur lægð reið yfir með svipuðu úrkomumagni. Hefilstjórinn varð veðurtepptur og fékk gistingu á næsta bæ. Menn gera það ekkert að gamni sínu að leita gistingar hjá ókunnugum á jóladag,“ sagði Bergþóra.
Á annan dag jóla bættist síðan við vandann þegar margir ökumenn sniðgengu lokanir og þurftu Vegagerðin og björgunarsveitir að eyða miklum tíma í að draga fasta bíla og tafði þetta snjómokstur.
Bergþóra sagði að þetta kalli á endurmat, það þurfi að endurskoða aðkomu björgunarsveitanna. Vegagerðin sé þakklát fyrir aðstoðina en það sé komið að þolmörkum þess sem hægt er að bjóða sjálfboðaliðum upp á kvöld, nætur og helgidaga við að bjarga fólki úti á vegum landsins.
