Það er engin hláka framundan en draga mun úr frosti um áramótin. Haraldur Ólafsson veðurfræðingur rýndi í veðurkortin fyrir DV og segir hann meðal annars að nokkuð vel líti út með veðurfar með tilliti til loftmengunar á nýársnótt en hann slær þann varnagla að þær horfur geti breyst er nær dregur helginni.

„Það lítur út fyrir að það dragi úr frosti um áramótin, en það er engin alvöru hláka í þessu og ekki einu sinni víst að hitinn nái upp fyrir frostmark,“ segir Haraldur. Hann sér meiri snjókomu um allt land:

„Það bætir í snjó í öllum landshlutum, éljagangur verður fyrir norðan og austan flesta daga og sunnanlands snjóar líklega mest á gamlársdag.“

Hins vegar spáir Haraldur átakalitlu veðri eftir helgi: „Ekkert bendir til mikilla átaka í veðrinu fyrstu daga janúar. Hitinn verður líklega víðast hvar undir frostmarki og snjókoma eða él víða um land.“

Haraldur segir horfur þokkalegar um áramótin: „Það snjóar líklega um landið sunnan- og vestanvert á gamlársdag og það er tvísýnt að hvaða marki hann nær að létta til á gamlárskvöld. Það verður því að reikna með einhverjum éljagangi víða um land, þar á meðal á höfðuðborgarsvæðinu á nýjársnótt.“

Sem fyrr segir telur Haraldur að eins og útlitið er núna sé spáin fyrir nýársnótt hagstæð hvað varðar loftmengun eftir flugeldaskot landsmanna: „Það eru horfur á vestan eða norðvestan golu sem hreinsar loftið yfir Reykjavík frekar fljótt á nýársnótt.“