BBC skýrði frá því í gærkvöldi hvernig ferðalaginu var háttað en undirbúningur þess hafði staðið yfir um langa hríð en hafði að vonum verið haldið stranglega leyndum því engum dylst að Rússar vilja gjarnan gera út af við Zelenskyy.
Á þriðjudaginn fór Zelenskyy í óvænta heimsókn til Bakhmut í austurhluta Úkraínu en þar geisa blóðugir bardagar og hefur ástandinu þar verið líkt við bardaga í fyrri heimsstyrjöldinni.
Frá Bakhmut fór hann síðan aftur til Kyiv og fljótlega eftir komuna þangað fór hann með næturlest til pólska bæjarins Przemysl. Þar sást til hans og fylgdarliðs hans á brautarpallinum snemma á miðvikudagsmorgun.
Þar beið hans bílalest. Margir af bílunum voru af gerðinni Chevrolet Suburban en það eru bílar sem bandarísk yfirvöld nota mjög oft.
BBC segir að fluggögn sýni að ekki löngu síðar hafi Boeing C-40 flugvél tekið á loft frá flugvellinum í Rzeszow, sem er um 80 km vestan við Przemysl. Talið er að Zelenskyy hafi verið í þeirri vél.
Vélin tók stefnuna til Englands en áður en henni var flogið út yfir Norðursjóinn skannaði njósnavél frá NATO himininn og hafið en rússneskir kafbátar halda sig oft á þessum slóðum. Véli Zelenskyy fékk síðan fylgd F15 orustuþotu áleiðis til Bandaríkjanna þar sem vélin lenti um hádegi.
BBC bendir á að það þurfi ekki að koma á óvart að engar upplýsingar hafi verið gerðar opinberar um ferð forsetans til Bandaríkjanna. Mikil leynd og öryggisgæsla eigi sér stað í tengslum við ferðir forseta á friðartímum og á stríðstímum séu leyndin og öryggisgæslan enn meiri.
Talið er að Zelenskyy sé kominn aftur til Úkraínu.
