Vetrarþjónusta Reykjavíkurborgar hóf að ryðja húsagötur borgarinnar í gær, sunnudag, og er áætlað að verkið taki fjóra til fimm daga. Aðalbrautir voru ruddar um helgina. Lögð er áhersla á að vinna í öllum hverfum samhliða og því verða engin hverfi útundan.

Í tilkynningu frá borginni um þetta segir:

„Þetta er mikið verk og búast má við því að hreinsun húsagatna taki fjóra til fimm daga. Göturnar sem verið er að ryðja eru samtals 1200 kílómetrar að lengd en það er hátt í allur hringvegurinn. Þar af eru húsagöturnar 240 kílómetrar sem er um það bil leiðin milli Reykjavíkur og Blönduóss. Í stígakerfinu er síðan verið að snjóhreinsa í kringum 800 kílómetra sem er svipað og vegalengdin til Raufarhafnar.“

Segir enn fremur að allt tiltækt lið Vetrarþjónustu borgarinnar hafi verið að störfum um helgina.

Sjá nánar hér