Jólahald hennar var nýlega til umfjöllunar í Horsens Folkeblad eftir að blaðamaður þess heimsótti Kolbrúnu. Þegar hún var spurð hvort einhverjar danskar jólahefðir hafi laumast inn á heimilið sagði hún nei, að minnsta kosti ekki hvað varðar matinn.
Segir blaðamaður að jólamaturinn hjá Kolbrúnu samanstandi aðallega af reyktu lambalæri, kæstum fisk og tartalettum með hamborgarhrygg.
Óhætt er að segja að fyrirsögn greinarinnar fangi athyglina en hún er: „Reykt lambakjöt og úldinn fiskur sem lyktar dögum saman – Kolbrún heldur fast í íslenskan jólamat“.
Úldni fiskurinn er auðvitað kæst skata en hana borðar Kolbrún á Þorláksmessu eins og venja er. Hún segist fara í mat hjá vinum sínum og borða skötu þar því lyktin sé svo sterk að húsið lykti í marga daga.
Hvað varðar sjálfa jóladagana borðar fjölskyldan hangilæri á aðfangadagskvöld, hamborgarhrygg á jóladag og á milli hátíða gæðir fjölskyldan sér á afgöngunum í tartalettum.
Blaðamaður segir síðan að Kolbrún hafi boðið honum upp á íslenskar kleinur með rúsínum og segir að líklega verði maður að vera Íslendingur til að finnast þær betri en danskar kleinur. En miðað við myndina sem hann birtir af kleinunum þá voru það ástarpungar sem voru bornir á borð fyrir hann.
