Þá heiðraði Pútín 12 rússneska hermenn, sem hann sagði vera „rússneskar hetjur“, með heiðursmerkinu „Rússnesk hetja“ en það er eitt æðsta heiðursmerkið sem rússneskir hermenn geta hlotið.
Ljósmynd var að sjálfsögðu tekin af Pútín og hermönnunum við þetta tækifæri en myndin hefur svo sannarlega fangað athygli marga á Internetinu.
Pernille Slot, sem er sérfræðingur í líkamstjáningu, sagði í samtali við B.T. að eitt og annað við myndina veki athygli. Til dæmis hvað salurinn, sem mennirnir eru í, sé stór og glansandi. Það sé eitthvað sögulegt, hátíðlegt og heilagt yfir honum. Þetta líkist horfnum tíma, eitthvað sem sem tilheyri fortíðinni.
En hún tók einnig eftir atriði sem margir hafa bent á. Það er hæð mannanna á myndinni. Samkvæmt opinberum upplýsingum þá er Pútín 170 cm en samt sem áður eru flestir hermennirnir lægri en hann, ekki síst þeir sem standa nálægt honum.
Slot sagði að Pútín vilji láta líta út fyrir að hann sé valdamikill, ríkur. Þess vegna „blási“ hann sig upp til að virðast stærri.
Hún sagðist oft hafa tekið eftir því að Pútín vilji láta líta út fyrir að hann sé hærri en raun ber vitni og að hann geri margt til að láta líta út fyrir að hann sé hærri en hann er. Það sé ekki eðlilegt. Hann glími greinilega við vandamál hvað þetta varðar.
„Það er næstum eins og hann vilji vera Instagram-fullkominn. Einnig með glæsilegan bakgrunn. En þetta virkar meira sem hróp á hjálp. Hann líkist manni sem líður illa andlega,“ sagði hún.
Hún sagði einnig að líkamsstaða hans bendi til að hann sé spenntur, undir miklu álagi: „Þegar ég sé þessa mynd, hugsa ég með mér: „Ó, mamma hans hefði átt að faðma hann aðeins oftar, faðir hans hefði átt að hrósa járnbrautarteinunum hans aðeins meira. „Því það er eitthvað mikið að.“
Margir netverjar hafa einnig bent á að enginn skuggi falli af Pútín á myndinni þrátt fyrir að skuggi falli af hinum mönnunum.
