Alexander Kjartansson var þann 11. nóvember sakfelldur fyrir stórfellt brot í nánu sambandi gegn fyrrverandi sambýliskonu sinni, en dómurinn var birtur á vef dómstólanna í dag. Dómurinn var kveðinn upp í Héraðsdómi Reykjavíkur.

DV greindi frá ákæru málsins í haust:

Ákærður fyrir 11 brot eftir hryllingssambúð – Herti öryggisbelti um háls hennar og hafði þvaglát yfir hana

Ákæruliðir voru alls 11 og var Alexander meðal annars sakaður um að hafa haft þvaglát yfir konuna. Einnig var hann sakaður um margskonar líkamlegt ofbeldi auk skemmdarverka á eigum konunnar. Athygli vekur að Alexander var sýknaður í fjölmörgum ákæruliðum þrátt fyrir að dómarinn teldi framburð konunnar trúverðugri en framburð hans. En dómarinn taldi hins vegar að fullnægjandi gögn skorti varðandi marga ákæruliðina.

Alexander játaði skemmdarverk á eigum konunnar og var hann sakfelldur fyrir þau. Hann var jafnframt sakfelldur fyrir eftirfarandi ofbeldisbrot gegn konunni sem átti sér stað, eins og önnur meint brot í ákærunni, árið 2018:

„Mánudaginn 17. september, inni á þáverandi heimili þeirra að […], hellt úr kaffibolla yfir A, sparkað í aftanvert læri hennar, farið með hana inn á baðherbergi þar
sem ákærði hrinti henni svo að hún féll og skall með mjóbakið á salernið, sparkað í klof hennar og stigið með hælnum ofan á ristina á henni, rifið í hár hennar og sparkað í hana þar sem hún lá á gólfinu. Því næst skipaði ákærði A að þrífa upp kaffið. Af framangreindri háttsemi hlaut A eymsli víða um líkamann, einkum á baki.“

Skar í sundur hettupeysu og rústaði rándýrri tölvu

Alexander var sakfelldur fyrir margvísleg skemmdarverk á eigum konunnar, meðal annars að hafa skorið í sundur hettupeysu hennar með hníf, borað með borvél í gegnum tölvutösku og rústað Macbook pro tölvu að verðmætti hátt í 400 þúsund krónur. Kastaði hann tölvunni í gólfið og stappaði á henni með fæti.

Hann sturtaði einnig dýrum skartgripum konunnar ofan í klósettið með þeim afleiðingum að munirnir glötuðust. Einnig eyðilagði hann fyrir henni dýra myndavélarlinsu.

Í dómnum segir að brot Alexanders gegn konunni hafi verið til þess fallin að valda henni verulegum miska. Gögn málsins styðji að hún hafi orðið fyrir miklu áfalli vegna brotanna sem hann er þó sakfelldur fyrir.

Niðurstaðan er sú að hann er dæmdur í sex mánaða fangelsi og til að greiða konunni hátt í 1,4 milljónir í miskabætur.

Dómnum verður áfrýjað

Samkvæmt heimildum DV mun héraðssaksóknari áfrýja málinu til Landsréttar, krefjast þyngri refsingar yfir Alexander og sakfellingar í fleiri ákæruliðum.

Dóminn má lesa hér