Enn er hart barist við bæinn Bakhmut í austurhluta Úkraínu en þar hefur verið barist stöðugt síðan í maí. Á þessum sex mánuðum hafa Rússar náð að sækja fram nokkra kílómetra í einu en alltaf hefur Úkraínumönnum tekist að hrekja þá aftur skömmu síðar.

Gríðarlegt mannfall hefur verið í þessum bardögum og hafa sérfræðingar líkt átökunum þarna við það sem gerðist í fyrri heimsstyrjöldinni. Það er að hermenn húka í skotgröfum og stórskotalið lætur sprengjum rigna yfir þá.

Fyrir helgi sögðust Rússar hafa náð þremur bæjum nærri Bakhmut á sitt vald. En eftir því sem bandaríska hugveitan Institute for the Study of War (ISW) segir í greiningu þá hafa Rússar ekki staðið sig mjög vel í bardögunum við Bakhmut.

Er það mat ISW að bardagarnir hafi kostað Rússa mikla krafta og valdið þeim miklu tjóni, bæði manntjóni og tjóni á hergögnum, án þess að þeir hafi náð neinum stórum áföngum.

„Aðgerðir Rússa nærri Bakhmut benda til að rússnesku hersveitunum hafi mistekist að læra af fyrri sóknaraðgerðum sínum,“ segir í greiningu ISW.

ISW segir að sóknaraðgerðir Rússa á þessu svæði séu ónauðsynlegar og hafi haft önnur áhrif en Rússar höfðu í hyggju og það geti Úkraínumenn nýtt sér.

„Sóknir Rússa við Bakhmut hafa kallað á stóran hluta af bardagafærum rússneskum hersveitum sem aftur gerir sóknir Úkraínumanna annars staðar auðveldari,“ segir ISW.