Þetta er mat norskra sérfræðinga sem ræddu við Dagbladet. Þeir segja að Pútín hafi gert „mjög alvarleg mistök“ í upphafi innrásarinnar sem eigi sinn þátt í að nú er stríðið orðið að langvarandi stríði þar sem niðurstaðan mun væntanlega ráðast af hvor aðilinn hefur meira úthald.
„Ég held að stærstu mistök Pútíns séu innlimun héraðanna fjögurra. Það er óljóst hvað var innlimað, það var ekki gerð nein trúverðug tilraun til að reyna að láta „atkvæðagreiðslurnar“ líta út fyrir að vera trúverðugar og Rússar hafa ekki hernaðarlegan styrk til að verja innlimuðu svæðin,“ sagði Iver B. Neumann, sérfræðingur í málefnum Rússlands.
Hann sagði að þetta hafi verið pólitískur leikur sem hafi ekki verið hugsaður fram í tímann og sé því ekki annað að sjá en að um mistök hafi verið að ræða.
Tormod Heier, prófessor í hernaðartækni og hernaðaraðgerðum við norska varnarmálaskólann, sagði í heildina hafi Rússland ekki verið í eins viðkvæmri stöðu og nú síðan í lok síðari heimsstyrjaldarinnar.
Hann sagði að eftir átta mánaða stríð viti ráðamenn í Kreml að stríðið hafi gengið mjög illa. Það virðist sem það fækki sífellt í þeim hópi sem Pútín treystir og þeir sem eftir séu í þeim hópi séu ekki þeir sem eru næst nútímanum.
Hann sagði að Rússar séu lélegir í nútímahernaði sem og í blendningshernaði. Það sé ekki svo gott fyrir þá því blendingshernaður þeirra beinist að viðkvæmum vestrænum samfélögum og eigi að vera miklu auðveldari en að berjast við hersveitir NATO á vígvellinum.
Dag hvern þurfi milljónir Evrópubúa að reyna að forðast að láta aðgerðir Rússa hræða sig en þeir reyna að sá efasemdum meðal almennings um getu stjórnvalda til að takast á við stríðið og allt sem því fylgir. Enn sem komið er hafi Rússum ekki tekist að stöðva stuðning Vesturlanda við Úkraínu sem fái enn vopn og mannúðaraðstoð.
