Klukkan 00.48 var bifreið ekið á steypuklump í Miðborginni, klumpurinn er notaður til að þrengja akbraut vegna viðgerða á henni. Við áreksturinn valt bifreiðin á hliðina, skall á ljósastaur og endaði við húsvegg þar sem rúða brotnaði í íbúð. Meintur ökumaður var handtekinn á vettvangi. Hann er grunaður um að hafa verið undir áhrifum áfengis og fíkniefna. Að sýnatöku lokinni fór hann að kvarta undan verkjum í líkamanum og var þá fluttur til aðhlynningar á bráðadeild.

Um klukkan tvö í nótt var tilkynnt um innbrot í tóbaksverslun í Miðborginni. Þar var búið að brjóta rúðu og fara inn. Maður var handtekinn á vettvangi en lögreglumenn sáu hann koma út úr versluninni með ætlað þýfi í poka. Hann var vistaður í fangageymslu.

Í Hafnarfirði var tilkynnt um innbrot í bílskúr við fjölbýlishús í gærkvöldi. Þar var dýru golfsetti stolið.

Um klukkan hálf tólf var tilkynnt um þrjá menn sem voru að brjótast inn í gáma í Hafnarfirði. Þegar lögreglan nálgaðist svæðið náðu tveir þeirra að hlaupa á brott. Einn var handtekinn. Að upplýsingatöku lokinni var hann fluttur á bráðadeild þar sem hann var með sýkingu í hendi.