Þetta kemu fram í nýlegri stöðuskýrslu bandarísku hugveitunnar Institute for the Study of War (ISW).
Í stöðuskýrslunni kemur fram að þegar Úkraínumenn hafa náð vesturhluta Khersonhéraðs á sitt vald muni þeir líklega reyna að flytja hersveitir sínar til með það að markmiði að „styrkja yfirstandandi gagnsókn sína í Luhansk eða til að hefja nýja gagnsókn annars staðar.“
ISW segir að Rússar séu að styrkja varnarlínur sínar í Luhansk en samt sem áður hafi Úkraínumönnum tekist að sækja fram og engin ástæða sé til að ætla að illa þjálfaðir og illa útbúnir rússneskir hermenn, með lítinn baráttuvilja, muni geta stöðvað sókn úkraínsku hersveitanna.
ISW segir að því sé ekkert sem bendi til að það dragi úr bardögum í vetur. Báðir stríðsaðilar sitji nú í aurbleytu og muni líklega ekki hætta að berjast þegar jörð frýs en það gerir þeim erfiðara fyrir að beita þungum tækjum. Þá hafi bardagar tilhneigingu til að harðna frekar en hitt þegar hitinn lækkar.
Einnig segir hugveitan að það muni gagnast Rússum mjög ef til vopnahlés kemur eða bardagar stöðvast. Þeir hafi meiri þörf fyrir að geta flutt hersveitir sína til og endurskipulagt þær. En samt sem áður er ekkert sem bendir til að Pútín vilji fara þessa leið að mati ISW.
„Pútín ætti að hafa áhuga á vopnahléi. Hann ætti að viðurkenna að hann neyðist til að hvíla hersveitir sínar og veita nýliðum, sem streyma inn í hersveitirnar, tækifæri til að aðlagast þeim, fá þjálfun og undirbúa sig undir alvöru bardaga. Hann ætti að vilja koma í veg fyrir að Úkraínumenn geti nýtt sér þann tilfinningalega ávinning sem sigrar þeirra hafa veitt þeim. Það að Pútín haldi áfram að berja hersveitir sínar áfram við þessar kringumstæður eru því alvarleg mistök út frá hernaðarlegu sjónarmiði,“ segir hugveitan.
