Þrjátíu og níu ára gamall maður játaði líkamsárás en var ekki gerð refsing fyrir Héraðsdómi Austurlands þann 25. október síðastliðinn. Átök um eiginkonu mannsins, sem jafnframt er barnsmóðir brotaþolans, komu hér við sögu.
Maðurinn, sem ekki hefur gerst brotlegur við lög áður, var ákærður fyrir að hafa ráðist á mann utandyra fimmtudaginn 7. apríl síðastliðinn og slegið hann tvö högg með handarbaki og flötum lófa í andlitið, með þeim afleiðngum að maðurinn hlaut nokkra áverka í andliti, sem og áverka á hljóðhimnu sem olli blæðingu í vinstra eyra.
Auk þess að játa brotið sýndi hinn ákærði iðrun yfir broti sínu fyrir dómi.
Um aðdraganda árásarinnar segir orðrétt í dómnum:
„Af gögnum verður helst ráðið að nokkur aðdragandi hafi verið að árás ákærða, þ. á m. að hann hafi hlaupið til þegar hann hafi séð eiginkonu sína á gangi um […], og að brotaþoli hafi verið þar nærri, en fyrir liggur að konan hafði þá skömmu áður óskað eftir aðstoð lögreglu. Eiginkonan er barnsmóðir brotaþola, og verður ráðið af gögnum að ágreiningur hafi verið með þeim um hríð um málefni barns þeirra. Liggur fyrir að ákærði fór í greint sinn að brotaþola í skyndi, og að þá hafi komið til. skammvinns atgangs og rifrildis með þeim og þá þannig að í fyrstu hafi höfuð þeirra rekist saman. Í kjölfarið hafí ákærði í tvígang slegið brotaþola tvö högg með handarbaki og flötum lófa í andlitið, með þeim afleiðingum sem lýst er ákæru, sbr. að því leyti efni áðurnefndra gagna frá sjúkrahúsi.“
Niðurstaða dómsins var sú að gera manninum ekki refsingu svo lengi sem hann haldi skilorð í tvö ár.
