Hún segist hafa verið áskrifandi að DV hér á árum áður því þá hafi hún haft gaman af slúðri og uppsláttarfréttum. Nú sé það hins vegar Mogginn vegna vandaðrar fréttamennsku, oftast, og hófstilltrar umfjöllunar, sem sé blaðið sem hún kaupi.
„Ég geymi mér jafnvel Sunnudagsblaðið svo ég hafi eitthvað að lesa með sunnudagskaffinu. Tilhlökkunin er þó blendin núorðið því sumir fréttamenn þess virðast hafa tekið RÚV sér til fyrirmyndar og látið af hlutleysi í fréttavali og frásagnarhætti. Ég tók fyrst eftir þessari breytingu á Mogganum eftir að Trump var kjörinn forseti 2016. Þá breyttist RÚV strax í fréttastöð demókrata og þar sem ég er hvorki höll undir ný-marxisma né heimsyfirráð Wall Street/Davos þá hafa málin þróast svo að ég hef misst alla löngun til að hlusta á fréttir þaðan, það veldur mér hreinlega líkamlegum óþægindum,“ segir hún.
Hún segir að Stundina hafi hún ekki keypt síðan blaðið gerði, að hennar sögn, illgirnislegar árásir á Sigríði Anderson og Fréttablaðið segist hún yfirleitt ekki líta í því fátt bitastætt sé í því. DV kemur ekki lengur út í pappírsformi og því eru aðeins Mogginn og Bændablaðið eftir.
Hún segist skrifa greinina í þeirri von að Mogginn haldi áfram að veita henni ánægju og segir að skortur á hlutleysi í fjölmiðlum og gildishlaðið orðalag fari í taugarnar á henni. Hún segir að stríðsæsingur Bandaríkjastjórnar hafi náð til Moggans, væntanlega í gegnum Reuters og AP fréttastofurnar.
„Tillögum Elons Musk um að Krímskagi, sem Katrín mikla lagði undir Rússland 1783 en Krúsjeff skráði úkraínskan á sínum tíma, þrátt fyrir að 75% íbúa væru rússneskir, yrði viðurkenndur hluti af Rússlandi, kosningar í Donbas yrðu endurteknar undir eftirliti SÞ og Úkraína lýsti yfir hlutleysi var hreint ekki vel tekið. Úkraína skal sigra Rússa og ná yfirráðum yfir bæði austurhéruðunum og Krímskaga. Eftir Maidan-stjórnarskiptin 2014 var lagt í stríð gegn íbúum austurhluta Úkraínu og Minsk-friðarsamkomulagið ekki virt. Lög voru sett þar 2019 sem með viðbótum afnema rétt rússneskumælandi fólks til að tala tungumál sitt. Rússneskri menningu og Rússum skyldi útrýmt í Donbas-héruðunum, sem flokkast undir þjóðarmorð. Bæði leiðtogar Vesturlanda og fjölmiðlar þeirra hvetja flestir til þess, líka Morgunblaðið. Hatur gegn Rússum og öllu sem rússneskt er er allsráðandi, jafnvel á köttum þeirra og trjám,“ segir hún.
Hún segir síðan að þar sem hergagnaiðnaðurinn í Bandaríkjunum blómstri þessa dagana sé tregða við að tala fyrir friði. Mogginn eigi þó að geta talað fyrir friði. „Menn þurfa bara að hætta að trúa stóru bandarísku fréttastofunum eins og nýju neti. Samkvæmt Gallup hefur tiltrú Bandaríkjamanna sjálfra á fjölmiðlum sínum aldrei mælst minni. Menn líta ekki á þá sem hlutlausa. Vinsamlega hættið að láta stýrast af hatursáróðri hagsmunahópa í Bandaríkjunum. Ég vil gjarnan geta haldið vana mínum og sest niður með miðdegiskaffibollann minn og opnað Moggann með tilhlökkun,“ segir Ingibjörg að lokum.
