Lögreglan á höfuðborgarsvæðinu vonast eftir því að eiga rólega vakt um helgina, það sé langbest fyrir alla. Þetta er á meðal þess sem fram kemur í færslu sem lögreglan birti á Facebook-síðu sinni í dag. Þá bendir lögreglan á að útlit er fyrir ágætu veðri um helgina þó svo að lítið fari fyrir sólinni í veðurkortunum.

Í færslunni segir svo að fólk geti tekið sér ýmislegt fyrir hendur um helgina en að lögreglan mæli til dæmis með kósíkvöldi. „Það klikkar sjaldnast,“ segir hún.

„Munið bara að láta ekki síma, eða önnur snjalltæki, eyðileggja þá ánægju- og gæðastund eins og mamman í meðfylgjandi myndbandi gerist sek um.“

Myndbandið sem um ræðir má sjá hér fyrir neðan:

Þessu tengt minnir lögreglan svo á hvatningu Barnaheilla um að leggja frá sér símann og önnur snjalltæki í hálfan sólarhring þann 30. október, næstkomandi sunnudag, frá kl. 9-21. „Sjálfsagt er þetta áskorun sem reynist mörgum erfið, en markmiðið með henni er að vekja foreldra og annað fullorðið fólk til umhugsunar um áhrif snjalltækja á samveru og nánd innan fjölskyldna.“

Hægt er að finna frekari upplýsingar um átakið á barnaheill.is