Þetta sagði Flemming Splidsboel Hansen, sérfræðingur hjá Dansk Institut for Internationale Studier, í samtali við Ekstra Bladet. Hann sérhæfir sig í alþjóðaöryggismálum og heimssýn.
Hann sagði að Rússum finnist þeir vera undir þrýstingi og þeir reyni að hrekja úkraínskar hersveitir aftur á bak og skemma mikilvæga innviði í Úkraínu. „Ef Rússum finnst þetta ekki duga til og þeir eru undir miklum þrýstingi, þá er auðvitað hætta á að þeir flytji aðgerðir sínar lengra út,“ sagði hann.
Í nýrri skýrslu leyniþjónustu danska hersins, sem var birt í gær, kemur fram að enn sé „ólíklegt“ að Rússar vilji lenda í „beinum hernaðarátökum“ við NATO. En einnig kemur fram að auknar líkur séu á að Rússar muni komast að þeirri niðurstöður að áframhaldandi stuðningur Vesturlanda við Úkraínu sé bein ógn við fullveldi Rússlands og yfirráð þeirra yfir eigin landsvæðum eftir „innlimun“ fjögurra úkraínskra héraða í Rússland.
Hansen sagði að ekki sé útilokað að á einhverjum tímapunkti muni Rússar reyna að grípa til aðgerða gegn fleiri ríkjum en Úkraínu. Þetta geti verið ríki sem styðja Úkraínu af miklum krafti. Til dæmis geti þetta verið aðgerðir þar sem reynt verður að hæfa vopnasendingar til úkraínska hersins eða þá að reynt verði að hæfa almenna lestarumferð, bílaumferð eða orkuflutningskerfi. Ef það verði gert, verði það hugsað sem „áreitni“ sem geti haft ákveðinn kostnað í för með sér fyrir ríkin.
Þegar hann var spurður hvenær hann telji að Rússar komist að þeirri niðurstöðu að stuðningur Vesturlanda ógni fullveldi þeirra sagði hann: „Hugsanlega stefnum við þangað.“
Hann sagðist telja að þetta muni gerast í nokkrum stigum og spurningin sé hvort þetta sé ekki byrjað að einhverju leyti: „Við höfum heyrt um nokkur atvik sem við höfum ekki getað fundið skýringu á. Til dæmis skemmdarverk á þýska járnbrautarlestarkerfinu, þar sem óvissa er um hvað gerðist en afleiðingarnar voru miklar. Við höfum einnig heyrt um drónaflug í Noregi. Svo það er hugsanlegt að við séum komin nær þessu stigi,“ sagði hann.
