Tveir eru í haldi lögreglunnar á höfuðborgarsvæðinu eftir að ökumaður einn sinnti ekki stöðvunarmerkjum lögreglunnar og reyndi að stinga hana af í Grafarvogi. Eftirförin stóð ekki lengi yfir en á þeim stutta tíma sem hún stóð yfir ók ökumaðurinn á lögreglubifreið. Tveir voru í bifreiðinni og voru báðir handteknir og vistaðir í fangageymslu. Ökumaðurinn er grunaður um að hafa verið undir áhrifum áfengis og fíkniefna.

Þrír ökumenn voru handteknir grunaðir um að vera undir áhrifum áfengis og/eða fíkniefna.

Einn var handtekinn í Árbæ vegna húsbrots. Hann var vistaður í fangageymslu.

Afskipti voru höfð af einum einstaklingi í austurhluta borgarinnar en hann er grunaður um vörslu fíkniefna.

Í Laugarneshverfi kviknaði í pappakössum í húsi einu. Íbúarnir náðu sjálfir að slökkva eldinn. Lítið tjón hlaust af eldinum.

Nokkrar tilkynningar bárust um minniháttar umferðaróhöpp og þjófnaði úr verslunum.