Einar Þór Sverrisson, lögmaður tónlistarmannsins Bubba Morthens og Sölvi Blöndal, framkvæmdastjóri Öldu Music, funduðu með Stefáni Eiríkssyni útvarpsstjóra og kröfðust þess að því yrði svarað hvers vegna nýlegt lag sem Bubbi gaf út með tónlistarmanninum Auði hafi varla heyrst á Rás 2. Frá þessu greindi Vísir í gær en málið vakti töluverða athygli.

Tárin falla hægt er lagið sem um ræðir en það hefur setið á toppi íslenska vinsældarlistans á Spotify síðan það kom út. Lögmaður Bubba og Sölvi furðuðu sig á því að lag sem nýtur svo mikilla vinsælda á Spotify fái ekki sambærilega spilun á Rás 2. Samkvæmt heimildum Vísis vildu Einar og Sölvi fá svör við því hvort ástæðuna fyrir þessari spilun mætti rekja Atla Más Steinarssonar dagskrárgerðarmanns á Ríkisútvarpsinu en Atli hefur opinberlega gagnrýnt Bubba fyrir að vinna með Auði.

Bubbi er með sýningu í Borgarleikhúsinu þar sem fjallað er um kynferðisofbeldi sem hann lenti í. Síðan ákveður hann að gera lag með Auður. Spyr engan og tekur sér stöðu gegn þolendum. Hvað hefur hann að segja núna?

Hmm? @BubbiMorthens ?https://t.co/9j5Bk89HMc

— Atli Már Steinarsson (@RexBannon) October 14, 2022

Matthías Már Magnússon, dagskrárstjóri Rásar 2, hafnaði því þó að Atli Már bæri ábyrgð á dræmri spilun landsins á stöðinni. Matthías sagði að stöðin spili fleiri titla sjaldnar, taktík Rásar 2 sé að spila frekar mörg lög en fá.

Þá sagði Matthías að Atli Már væri ekki í tónlistarráði Rásar 2, sem sér um að velja þá tónlist sem þar er spiluð. „Það er vissulega rétt að hann kom að máli við mig áður en lagið kom út og hafði sínar skoðanir á því. En hann sagði líka, í viðurvist vitnis, að hann væri líklega vanhæfur til að tjá sig um það.“

„Afsakið en vá hvað þetta er eitthvað níðangurslegt“

Fréttir af þessu öllu saman ollu miklu fjaðrafoki á samfélagsmiðlum, sérstaklega á Twitter, en þar fékk Bubbi sjálfur yfir sig mestu gagnrýnina. Í gærkvöldi lokaði Bubbi reikningi sínum á Twitter en hann hafði þá um daginn verið merktur í fjölmörgum færslum þar sem þessi fundur var gagnrýndur. Hvort áreitið hafi valdið því að Bubbi lokaði reikningi sínum eða ekki skal þó ósagt látið.

Jakob Bjarnar Grétarsson, fréttamaður á Vísi og sá sem skrifaði upprunalegu greinina um málið, hefur nú tjáð sig um þetta fjaðrafok sem orsakaðist vegna fréttarinnar. Í færslu sem Jakob birtir á Facebook-síðu sinni í dag gagnrýnir hann þau sem hjóluðu í Bubba í gær.

Færslu Jakobs í heild sinni má sjá hér fyrir neðan: