Stríðsherrann Ramzan Kadyrov, leiðtogi Téténíu, hefur birt myndband sem hann fullyrðir að sýni þrjá táningssyni leiðtogans á vígvellinum í Úkraínu. Í myndbandinu má sjá syni leiðtogans, Akhmat (16 ára), Eli (15 ára) og Adam (14 ára) skjóta úr sprengjuvörpum nálægt víglínunni.
Kadyrov, sem er náinn bandamaður Vladimir Pútín Rússlandsforseta, segir að synir hans hafi veitt rússneskum hermönnum, sem börðust gegn framrás Úkraínumanna, stuðning.
Það vakti mikla athygli þegar Kadyrov greindi frá því í færslu á Telegram í byrjun mánaðarins að hann hygðist senda syni sína, sem allir hafa hlotið herþjálfun frá unga aldri, á vígvöllinn en stríðsherrann taldi að tími væri kominn til að þeir upplifðu alvöru átök.
Um er að ræða skýrt brot á sáttmála Sameinuðu þjóðanna sem Rússland hefur undirritað og miðar að því að börn undir átján ára aldri taki ekki þátt í hernaðarátökum. Þá lítur Alþjóðasakamáladómstóllinn, ICC, á það sem stríðsglæp að börn undir fimmtán ára aldri taki þátt í hernaðarátökum, þó Rússar virði ekki þeirra lögsögu.
Rétt er þó að geta þess fullyrðingar Kadyrov eru iðulega ekki alveg sannleikanum samkvæmt. Í mars á þessu ári montaði hann sig meðal annars af því að vera sjálfur á vígvellinum nærri Maríupól þar sem harðir bardagar geisuðu. Hann birti mynd því til sönnunnar en illu heilli mátti þar sjá merki bensínstöðvar sem er ekki með neinn rekstur í Úkraínu heldur aðeins Rússlandi.
