Til skoðunar er hjá Biskupsstofu að svipta sóknarprestinn fyrrverandi, Gunnar Björnsson, hempunni. Stundin greinir frá þessu.

Séra Gunnar er sestur í helgan stein en hefur af og til freistað þess að sinna prestsverkum þegar eftir því hefur verið óskað sérstaklega. En slíkum beiðnum hefur verið neitað.

Mannlíf greindi frá því í september að Gunnari hefði verið bannað að jarðsyngja konu í Hveragerði þrátt fyrir eindregna ósk fjölskyldu hinnar látnu. Mikil vinátta hefur verið milli Gunnars og fjölskyldu konunnar. Sonur konunnar sakaði þar Agnesi Sigurðardóttur biskup um hatur í garð séra Gunnars.

Í Stundinni í dag er rifjuð upp saga ásakana á hendur séra Gunnari um kynferðisbrot og óviðeigandi hegðun. Árið 2009 sýknaði Hæstiréttur Gunnar af ákæru um kynferðislega áreitni gegn tveimur stúlkum á Selfossi á þeim forsendum að háttsemin hefði í skilningi laganna ekki getað flokkast sem kynferðisleg áreitni eða ósiðlegt athæfi. Þrjár aðrar slíkur kærur á Gunnar voru rannsakaðar af lögreglu en málin felld niður.

Bæði siðanefnd Prestafélags Íslands og úrskurðarnefnd þjóðkirkjunnar fjölluðu um mál séra Gunnars og töldu hann hafa brotið siðferðislega af sér. Af þeim sökum er sú afstaða biskups og Biskupsstofu skýr, að hann eigi ekki að fá að sinna prestsverkum framar.

Við þetta má bæta að árið 2019 stigu fimm konur fram í Stundinni og lýstu kynferðislegri áreitni Gunnars gegn sér þegar þær voru á barnsaldri og voru nemendur hans í tónlist.

Í lok fréttar Stundarinnar segir að engin fordæmi séu fyrir því hérlendis að prestar séu sviptir hempunni á seinni árum. Engu að síður mun það vera til umræðu á Biskupsstofu að það verði gert í tilfelli Gunnars og mögulega fleiri presta sem gerst hafa sekir um siðferðisbrot.