Mörg hundruð milljónir glíma við offitu og því eru þessar niðurstöður mikilvægar til að öðlast innsýn í hvernig er hægt að draga úr líkunum á offitu á einfaldan hátt, með því að borða máltíðirnar nokkrum klukkustundum fyrr. Fjallað var um þetta á vef Sciencealert.
Fyrri rannsóknir hafa staðfest tengsl á milli tímasetninga máltíða og þyngdaraukningar. Í þessari nýju rannsókn vildu vísindamenn kanna tengslin nánar og skoða líffræðilegu ástæðurnar fyrir þessu.
Frank Scheer, taugasérfræðingur við Brigham and Women‘s Hospital í Boston, sagði að vísindamennirnir hafi viljað prófa þá ferla sem geta skýrt af hverju það að borða seint eykur líkurnar á offitu.
Hann sagði að fyrri rannsóknir hafi sýnt tengsl á milli þess að borða seint og aukinnar hættu á offitu og verri árangurs við að léttast. Vísindamennirnir hafi viljað öðlast meiri skilning á af hverju þetta gerist.
Sextán manns tóku þátt í rannsókninni og var líkamsþyngdarstuðull þeirra, BMI, ofþyngd eða mjög mikil ofþyngd.
Allir þátttakendurnir fóru í gegnum tvær mismunandi tilraunir sem vörðu í sex daga. Fylgst var nákvæmlega með svefni þeirra og matarneyslu í nokkrar vikur fyrir og eftir tilraunirnar.
Í annarri tilrauninni héldu þátttakendurnir sig við mjög nákvæma tímaáætlun um þrjár máltíðir á dag, morgunmat klukkan 9, hádegismat klukkan 13 og kvöldmat klukkan 18.
Í hinni voru máltíðirnar mun seinna eða frá klukkan 13 til 21.
Spurningalistar voru lagðir fyrir þátttakendurna, blóðsýni voru tekin úr þeim og ýmsar mælingar gerðar. Í ljós kom að þegar borðað var seint var magn hormónsins leptíns, sem stýrir þyngd, minna allan sólarhringinn. Það bendir til að þátttakendurnir hafi frekar fundið til svengdar. Ekki nóg með það, því þeir brenndu hitaeiningum hægar.
Rannsóknin leiddi einnig í ljós að munur var á hvernig líkaminn geymdi fitu eftir því hvenær máltíðirnar voru innbyrtar.
Niðurstöður rannsóknarinnar hafa verið birtar í vísindaritinu Cell Metabolism.
