Gabríel Aron Sigurðsson, 24 ára, var þann 6. október síðastliðinn dæmdur í átta mánaða fangelsi fyrir húsbrot og líkamsárás. Dómurinn var felldur í Héraðsdómi Reykjavíkur. Árásin átti sér stað í desember árið 2021. Í ákæru er árásinni lýst svo:
„Fyrir húsbrot, líkamsárás og hótun, með því að hafa laugardaginn 18. desember 2021 ruðst inn í íbúð A, kt. […]að […] í Reykjavík og kjölfarið veist með ofbeldi að A, með því að slá hana hnefahöggi í andlitið, hrinda A þannig að hún féll í gólfið, síðan hótað að drepa hana, þannig að A óttaðist um líf sitt og velferð og í framhaldinu slegið hana hnefahöggi í andlitið hægra megin, allt með þeim afleiðingum að A hlaut mar í kringum hægra auga og vægan heilahristing. M. 007-2021-[…]“
Konan sem varð fyrir þessari árás heitir Birna Karen Þorleifsdóttir og ræddi hún málið við DV síðastliðið sumar en þá hafði Gabríel Aron verið ákærður. Hún náði árásinni á öryggismyndavél.
„Ég keypti mér öryggismyndavél í einhverju flippi og síðan gerist þetta!“ segir Birna Karen. Hún sagði ennfremur:
„Ég var bara að tjilla með vinkonu minni sem ég hafði ekki hitt lengi og við vorum að taka upp TikTok vídeó, en hann var eitthvað að rífast við hana í símanum. Hann beið síðan fyrir utan hurðina hjá mér. Þegar ég hleypi henni út ryðst hann inn og byrjar að kýla mig. „Hann ryðst inn og byrjar að kýla mig í gólfið. Ég var með gervihár og hann ætlaði svoleiðis að smalla mér í vegginn.“ Birna segir að Gabríel Aron hafi kýlt sig með hnúajárnum.
Árásina má sjá í myndbandi neðst í fréttinni.
Fyrir héraðsdómi var Gabríel Aron einnig ákærður fyrir vopnalagabrot, þ.e. fyrir að hafa haft í fórum sínum hníf á almannafæri. Við annað tækifæri var hann sakaður um að hafa haft í fórum sínum rafstuðbyssu og sveðju. Hann var auk þess ákærður fyrir fíkniefna- og umferðarlagabrot og var sviptur ökurétti ævilangt.
Gabríel Aron játaði öll brotin fyrir dómi og viðurkenndi bótaskyldu. Var það virt honum til refsilækkunar en hann var dæmdur í 8 mánaða fangelsi. Hann var ennfremur dæmdur til að greiða Birnu Karen 350 þúsund krónur í miskabætur.
Gabríel Aron er sakaður um aðra mjög alvarlega líkamsárás sem átti sér stað í júní síðastliðið sumar. DV fjallaði um það mál. Kona ein sakar hann um að hafa ráðist inn í íbúð hennar og stungið hana með hnífi þar sem hún lá sofandi í rúmi sínu. Rúm konunnar var blóðugt eftir árásina. Konan segir að Gabríel Aron hafi áður verið vinur hennar. „Ég taldi hann vera vin minn,“ segir hún en árásin var nánast tilefnislaus, eða: „Ég svaraði ekki síma.“
Konan var mjög óttaslegin er hún ræddi við DV í sumar vegna þess að Gabríel Aron var látinn laus úr haldi lögreglu aðeins sex dögum eftir árásina.
