Niðrandi hljóðskilaboð sem ungt hinsegin barn fékk send voru sýnd í Kastljósi í gær. Hljóðskilaboðin eru afar sláandi en í þeim er barninu meðal annars sagt að „skjóta sig.“
Ingileif Friðriksdóttir, framleiðandi og baráttukona fyrir réttindum hinsegin fólks, kom með upptökuna af hljóðskilaboðunum í Kastljós. Hér fyrir neðan má sjá brot af skilaboðunum sem spiluð voru í þættinum.
„Gerðu mér greiða faggalíus.“
„Gamli, þú ert örugglega fokking nauðgari sem… ógeðið þitt.“
„Hann er nauðgari. Allir hommar eru nauðgarar.“
„Þegiðu djöfulsins tussan þín, þú ert svo fokking ljótur að þú byrjaðir að setja eitthvað inn á storyið þitt af því þú ert ekkert það venjulegur, þú veist hver setur… athyglissjúkur, já athyglissjúka druslan þín. Þegiðu maður, skíttu í þig þarna tíkin þín.
„Þú ert samkynhneigður, pældu í því að vera samkynhneigður, þú ert örugglega fokking ættleiddur. Samkynhneigður nauðgari.“
„Þú ert bara ógeðslegur náungi og mig langar bara að drepa þig, bara skjóttu þig.“
Ingileif ræddi það hvernig börn um landið hafa brugðist illa við er hún og eiginkona hennar, María Rut Kristinsdóttir, hafa verið að fræða um hinseginleikann. Þær hafi orðið varar við aukna fordóma sem lýsa sér meðal annars í því að hlegið sé að þeim ásamt því að þær eru spurðar óviðeigandi spurningum. „Við erum í fyrsta sinn að lenda í því að það er verið að hlæja að okkur, það er verið að spyrja mjög óviðeigandi spurninga, það er verið að segja hluti sem mjög augljóslega koma af einhverjum stað af fáfræði eða fordómum,“ sagði Ingileif.
„Þetta er að slá okkur sem blaut tuska í andlitið, því við héldum að þetta væri búið. En við erum búin að vera að reyna að átta okkur á því hvað það er sem veldur þessu. Við höfum verið að spyrja þessa krakka hvort þau séu á samfélagsmiðlum, sem þau eru allflest, og við höfum verið að spyrja þau: Hafiði verið að sjá hatursfullt efni í garð hinsegin fólks á síðustu mánuðum? Því miður þá eru eiginlega allir sem rétta upp hönd þegar við spyrjum þessara spurninga.“
María Rut vakti einnig athygli á hljóðskilaboðunum á Twitter-síðu sinni en hún segist vera með tilgátu um það hvers vegna þetta er að gerast.
Hér má heyra dæmi um það sem er að gerast. Hér eru ungir strákar að senda randomly á ungan hinsegin einstakling (allt börn). Sem þeir þekkja ekki neitt. Þeir búa í öðrum landshluta og ödduðu viðkomandi bara á Snapchat og byrjuðu að senda þetta. Og ekki einsdæmi. Því miður 😞 pic.twitter.com/5WhtqHTN58
— María Rut (@mariarutkr) October 10, 2022
„Á síðustu dögum höfum við Ingileif upplifað það að þegar við erum að flytja fyrirlesturinn okkar að krakkar séu að hlæja að okkur og spyrja vægast sagt fordómafullra spurninga byggðar á alveg ofboðslega miklum ranghugmyndum. Við spyrjum þau hvort þau séu á samfélagsmiðlum eins og TikTok eða Snapchat. Þau segja öll já. Svo spyrjum hvort þau hafi séð hatursfullt eða niðrandi efni í garð hinsegin fólks á síðustu mánuðum og þau rétta öll upp hendi. Öll.“
María Rut bendir á það sem gerist þegar börnin horfa á hatursfullt efni á samfélagsmiðlum, þá fara samfélagsmiðlarnir að sýna þeim meira af slíku efni. „Og hvað gerist þá? Þau festast í bergmálshelli og það normalíserast að sjá svona efni. Meginstraumsskoðunin breytist. Og það bitnar á jaðarsettum ungmennum,“ segir hún.
„Við verðum að átta okkur á því hvaða áhrif þetta getur haft. Einn sími er eins og eitt snjókorn. Einn bekkur af unglingum er snjóbolti. Einn skóli enn stærri bolti. Allir unglingar á Íslandi enn stærri og allur heimurinn snjóflóð. Sem skellur á jaðarsettu fólki um allan heim“
María segir þá að það sé búið að vera gott að vera hinsegin hér á landi en að það gerist ekki í tómarúmi. „Við erum mjög heppin með okkar opna og góða samfélag. Það gerist heldur ekki í tómarúmi. Ég hef staðið svooo stolt á hliðarlínunni þegar ég sé fleiri og fleiri ungmenni þora að vera þau sjálf. Eitthvað sem ég þorði ekki,“ segir hún.
„En veruleikinn er því miður sá að fleiri og fleiri eru að bakka aftur inn í skápinn. Því þau sjá líka það sem hinir sjá á þessum miðlum og verða fyrir barðinu á því. Vöknum og stoppum þessa vitleysu. Plís.“
