Hann segir að sprungur séu farnar að myndast í stoðum valdakerfis Pútíns í kjölfar herkvaðningarinnar þar sem 300.000 karlar verða kallaðir í herinn til að berjast í Úkraínu.
Khodorkovsky sagði að ákvörðunin hafi klofið þá sem styðja stríðið og þá sem eru á móti. Hann telur að lykilinn að því að setja þrýsting á valdakerfi Pútíns sé að finna á vígvöllunum í Úkraínu.
„Áhrifamesta aðferðin til að setja þrýsting á Pútín er að vinna sigra á vígvellinum í Úkraínu. Ef Úkraínumenn geta hratt og örugglega hrakið Rússa aftur að hinum alþjóðlega viðurkenndu landamærum Krím og Donbas þá gerir það út af við áhættuna til skamms tíma,“ sagði hann.
Khodorkovsky sagði að Pútín hafi enn tök á valdataumunum því honum hafi tekist að etja fólkinu, sem er í innsta hring hans, hvert upp á móti öðru.
Hann sagði að ef Pútín deyr eða verði ýtt úr embætti þá megi reikna með að nýr leiðtogi landsins verið allt öðruvísi. Annað hvort verði það harðlínumaður úr öryggisþjónustunni eða einhver sem getur tryggt betra samband við Vesturlönd. „Ég hallast að hinu síðarnefnda,“ sagði hann.
„Þá fyrst getum við kannski fengið friðsamt og eðlilegt land með nokkurn veginn lýðræðislegri stjórn. Að minnsta kosti á landsvísu,“ sagði hann einnig.
