Bandaríski alþjóðaþróunarsjóðurinn, USAID, hefur ákveðið að fjárfesta fyrir 55 milljónir dollara í Úkraínu. Fjármagnið fer til fjárfestinga í hitaveitum til að þetta stríðshrjáða land geti undirbúið sig undir hina köldu vetrarmánuði.

Þetta kemur fram í fréttatilkynningu frá sjóðnum.

Peningarnir fara í útbúnað sem á að tryggja húshitun víða í landinu. Munu sjö milljónir Úkraínubúa, í 19 héruðum, njóta góðs af þessu.

Sjóðurinn mun einnig útvega Úkraínubúum rafstöðvar og annan búnað fyrir sjúkrahús, móttökustöðvar flóttamanna og aðra staði þar sem fólk á hrakningum leitar skjóls.