Fregnir herma að diplómatísk spenna ríki nú á milli Rússlands og Kasakstan vegna stríðsins í Úkraínu. Yfirvöld í Kasakstan hafa neitað að verða við kröfu Rússa um að reka úkraínska sendiherrann úr landi vegna ummæla hans um dráp á Rússum.

Í viðtali, sem var tekið í ágúst, sagði Petro Vrublevskiy, sendiherra Úkraínu í Kasakstan, að „þeim mun fleiri Rússa sem við drepum, þeim mun færri Rússa munu börnin okkar þurfa að drepa“.

Maria Zakharova, talskona rússneska utanríkisráðuneytisins, sagði á þriðjudaginn að yfirvöld í Moskvu væru hneyksluð á að Vrublevskiy hafi ekki verið vísað úr landi.