Þórður Már Jóhannesson, stjórnarformaður Festi hf. óskaði á stjórnarfundi í dag eftir að láta af störfum sem stjórnarmaður í félaginu og um leið sem stjórnarformaður. Þetta kemur fram í tilkynningu frá Festi.

Í tilkynningunni kemur fram að stjórnin hafi fallist á erindið og að í kjölfarið hafi stjórnin skipt með sér verkum upp á nýtt. Guðjón Reynisson var kjörinn nýr formaður stjórnarinnar og þá var Margrét Guðmundsdóttir kjörin sem varaformaður.

Þessi tilkynning kemur í kjölfar þess að Vítalía Lazareva opnaði sig í hlaðvarpsþættinum Eigin konur í vikunni um ofbeldi sem hún varð fyrir í sumarbústaðarferð sem hún fór í með Arnari Grant en þau voru í ástarsambandi á þessum tíma. Vítalía segir að í sumarbústaðarferðinni hafi hún, Arna og vinir hans farið í heitan pott og þar hafi verið káfað á henni og farið yfir öll mörk.

Í kjölfar fréttaflutnings og umræðu um það sem Vítalía opnaði sig um hafa, auk Þórðar, þeir Hreggviður Jónsson, stjórnarformaður og aðaleigandi Veritas og Ari Edwald framkvæmdastjóri Ísey útflutnings stigið til hliðar í sínum störfum. Vítalía hafði nafngreint þá alla í tengslum við sumarbústaðaferðina á Instagram-síðu sinni.

Logi í frí og hefur verið betri

Vítalía nefndi einnig fjölmiðlamanninn Loga Bergmann í tengslum við ofbeldi sem hún hefur orðið fyrir. Nú hefur hann greint frá því að hann ætli í ótímabundið frí frá störfum sínum á K100. Logi sagðist vera fara í fríið í upphafi útvarpsþáttar síns og Sigga Gunnars í dag þegar sá síðar nefndi spurði Loga hvernig hann hefði það.

Ástæðan fyrir því að Logi er bendlaður við málið tengist ekki sumarbústaðarferðinni. Í hlaðvarpsþættinum lýsti Vítalía því að vinur Arnars, sem væri þjóðþekktur maður, hafi gengið inn á þau. Vítalía segir Arnar hafa viljað kaupa þögn þjóðþekkta vinarins með því að láta Vítalíu veita honum kynferðislegan greiða.

Fyrr í dag fullyrti Mannlíf að þjóðþekkti vinurinn sem gekk inn á þau sé Logi Bergmann en Vítalía hafði einnig sagt frá því á Instagram-síðu sinni og birt skjáskot af samskiptum þeirra.