Þetta segir í upphafi leiðara Fréttablaðsins í dag sem er skrifaður af Kolbrúnu Bergþórsdóttur. Hún segir að það sé sjálfsagt að gagnrýna aðgerðir yfirvalda og umræður um gagnsemi sóttvarnaaðgerða verði að fara fram. Það sé ljóst að aðgerðir stjórnvalda hafi ýtt undir ójöfnuð í samfélaginu og sjái sumir fram á atvinnumissi, gjaldþrot fyrirtækja og mikla tekjuskerðingu á sama tíma og sóttvarnaðgerðirnar hafi lítil sem engin áhrif á fjárhagslega afkomu annarra.
„Gagnrýni á harðar sóttvarnaaðgerðir kemur nær eingöngu frá hægri mönnum. Það er fjarska einkennilegt að vinstri menn sjái flestir enga ástæðu til að hafa áhyggjur af hörðum takmörkunum sem augljóslega auka misskiptingu í samfélaginu. Er þeim virkilega alveg sama um það eða eru þeir algjörlega gjaldþrota þegar kemur að hugmyndum um hvaða aðrar leiðir væri hægt að fara?“ spyr Kolbrún og hrósar síðan þeim úr læknastétt sem hafa stigið fram og bent á nýjar lausnir. „Þeim finnst við ekki geta hjakkað í sama farinu heldur vilja reyna að feta aðra braut nú þegar flestir landsmenn eru bólusettir. Við þurfum einmitt á slíkri hugsun að halda,“ segir hún.
Hún segir síðan að gagnrýni sé nauðsynleg en að það þurfi líka að vera vit í henni. „Það er til dæmis sjálfsagt að spyrja hvort nauðsynlegt sé að bólusetja börn við Covid og hvort það sé með öllu hættulaust. En þegar því er haldið fram fullum fetum að verið sé að gera börn að tilraunadýrum með því að sprauta í þau eitri og stefna heilsu þeirra í stórhættu þá er ástæða til að svara á hvassan hátt. Andstæðingar bólusetninga hafa haft hátt undanfarnar vikur. Þeir æpa gegn vísindum, telja lyfjafyrirtæki stunda tilraunastarfsemi sem sé almenningi, og sérstaklega börnum, lífshættuleg og gera sóttvarnalækni landsins upp allar mögulegar illar hvatir. Rökleysan í málflutningnum er slík að mann setur hljóðan. Á erfiðum tímum þurfum við á gagnrýnni hugsun að halda. En við höfum alls ekkert að gera við hávaðafólk sem afneitar vísindum,“ segir hún að lokum.
