Í gær minntu veðurguðirnir Íslendinga á það hvernig það er að búa á Íslandi þegar það er ekki sumar. Landsmenn, sem voru orðnir góðu vanir eftir óvenju hlýtt veður í september, fengu skell í gær þegar leiðindaveðrið kom til baka úr sumarfríi. Tré leystust upp með rótum, trampólín fóru á flug en í Möðrudalsöræfum fengu ferðamenn á bílaleigubílum að kenna á því.
Vilhjálmur Vernharðsson, eigandi ferðaþjónustufyrirtækisins Fjalladýrð á Möðrudal á Fjöllum, tók á móti ferðamönnunum með opnum örmum en hann sagði í samtali við Vísi í morgun að þeir hafi verið í áfalli eftir óveðrið. Nú sé verið að bíða eftir nýjum bílum fyrir ferðamennina en einnig þarf að koma ónýtu bílunum í burtu. Þeir eru flestir illa farnir og eru margir þeirra með allar rúður brotnar.
Friðrik Árnason, var á svæðinu í gær og náði myndum og myndbandi sem sýnir hversu illa bílarnir á svæðinu lentu í vindinum og grjótfoki. Á myndunum sem Friðrik tók má sjá nánar hversu illa leiknir bílarnir eru eftir óveðrið. Flestar rúðurnar eru mölbrotnar og liggja glerbrotin, ásamt snjó og drullu, í sætunum. Um er að ræða marga mismunandi bíla en flestir þeirra eru frekar nýlegir, eins og bílaleigubílar eru yfirleitt.
Nokkrir þeirra urðu þó fyrir meira tjóni en aðrir. Stór hvítur gistibíll frá bílaleigunni GoCampers er til dæmis með allar rúður brotnar en auk þess er bílstjórahurðin dottin af bílnum. Þá fauk skottið upp á einum bílnum og nokkrir þeirra eru með beyglur eftir nóttina.
Myndbandið sem Friðrik tók má sjá hér fyrir neðan:
