Magnus Carlsen, ríkjandi heimsmeistari í skák, hefur sent frá sér yfirlýsingu á Twitter þar sem hann sakar bandaríska stórmeistarann, Hans Niemann, formlega um svindl. Carlsen hefur fram að þessu farið sem köttur í kring um heitan graut varðandi það að ásaka Niemann formlega um svindl heldur ýjað að því með óljósum yfirlýsingum og látið Gróu á Leiti um að dreifa ásökunum á samfélagsmiðlum. Það hefur tekist með afbrigðum vel og hafa flestir fjölmiðlar heims greint frá hneykslinu sem reyndar endaði á bólakafi í skítafeni sem norski stórmeistarinn sá eflaust ekki fyrir.
Carlsen hefur sennilega viljað forðast meiðyrðamál frá Niemann og því hunsað kröfur skáksamfélagsins um að hann myndi tjá sig um málið og leggja fram einhverjar sannanir.
Það breyttist svo í kvöld þegar Carlsen birti yfirlýsingu sína. Í henni segir Norðmaðurinn að hann telji að Niemann hafi svindlað oftar en hann hefur viðurkennt en í kjölfar fjölmiðlastormsins játaði Bandaríkjamaðurinn að hafa svindlað tvisvar á netþjóninum Chess.com. Í fyrra skiptið þegar hann var 12 ára og seinna skiptið þegar hann var 16 ára en Niemann er í dag á tuttugasta aldursári.
Sjá einnig: Heimsmeistarinn Carlsen hætti í miðju móti og hávær orðrómur um svindl
Carlsen segist hins vegar fullviss um að nýlegri dæmi séu um svindl bandaríska stórmeistarans. Þá segir hann að Niemann hafi gjörsamlega pakkað honum saman í skákinni á Sinquefield-mótinu þar sem málið hófst en eins og frægt er hætti Carlsen í fyrsta sinn á ferlinum í skákmóti eftir að hafa tapað skákinni.
„Ég upplifði að hann væri ekkert stressaður né að einbeita sér að fullu í skák okkar á lykilaugnablikum en samt yfirspilaði hann mig með svörtu mönnunum sem er aðeins á fárra færi,“ segir Carlsen í yfirlýsingunni.
Hann segir mikilvægt að skorin verði upp herör gegn svindlurum í skák. „Ég vil ekki tefla á móti skákmönnum sem hafa svindlað í fortíðinni því ég veit ekki hvað þeir munu taka til bragðs í framtíðinni,“ segir Carlsen.
Hann segist eiga margt ósagt í málinu en geti það illa.
„Hingað til hef ég aðeins getað tjáð mig með gjörðum mínum og þær benda augljóslega til þess að ég vil ekki tefla við Niemann. Ég vona að sannleikurinn í þessu máli komi upp á yfirborðið, hver sem hann verður,“ skrifar heimsmeistarinn ennfremur.
Sjá einnig: Analísering á skáksvindli heimsmeistarans
My statement regarding the last few weeks. pic.twitter.com/KY34DbcjLo
— Magnus Carlsen (@MagnusCarlsen) September 26, 2022
