Flest bendir til að Rússar standi nú í tilgangslausum sóknaraðgerðum í stríðinu í Úkraínu. Þeir eru sagðir reyna að sækja fram í austurhluta landsins í stað þess að einbeita sér að því að verjast gagnsóknum Úkraínumanna.

Þetta er niðurstaða greiningar bandarísku hugveitunnar Institute for Study of War (ISW) sem setur spurningarmerki við hernaðartaktík Rússa í Úkraínu.

Í greiningu ISW segir að rússneskar hersveitir í Úkraínu haldi áfram að ráðast á Úkraínumenn í austurhluta landsins í stað þess að einbeita sér að eigin vörnum gegn gagnsóknum Úkraínumanna.

Rússar hafa einbeitt sé að bæjunum Donetsk og Bakhmut en þar hafa þeir gert árásir hvað eftir annað án þess að hafa unnið stóra sigra. Þessar árásir koma í kjölfar gagnsóknar Úkraínumanna i Kharkiv nýlega þar sem þeir hröktu rússneskar hersveitir frá stórum hluta héraðsins sem og smá hluta Luhansk.

En þrátt fyrir þessa þróun mála hafa Rússar ekki sent liðsauka til Kharkiv eða Luhansk enn sem komið er. Af þeim sökum er stór hluti af norðausturhluta landsins, sem er hernuminn af Rússum, viðkvæmur fyrir áframhaldandi gagnsókn Úkraínumanna segir í greiningu ISW.

En þrátt fyrir að ISW segi árásir Rússa við Bakhmut og Donetsk „tilgangslausar“ þá kemur hugveitan með skýringu á af hverju Rússar gera árásir þar. Hún er að bæirnir hafi „tilfinningalegt gildi“ fyrir þá Úkraínumenn, sem búa á svæðinu, sem eru hallir undir Rússa.

Verið sé að reyna að hvetja þennan hóp til dáða með árásunum. Segir ISW að Rússar sé mjög háðir því að fá hermenn frá Donetsk og Luhans héruðunum og það þurfi að tryggja að þeir sjái tilgang með því að berjast með Rússum.