Um klukkan 10 í morgun fékk lögreglan á Suðurlandi tilkynningu um torkennilegan hlut sem drengir höfðu verið að vasast með við gatnamót Tryggvagötu og Engjavegar á Selfossi.

Við athugun lögreglu þótti rétt að hluturinn yrði meðhöndlaður af varkárni og því var sérsveit ríkislögreglustjóra kölluð til með búnað til að leysa verkefnið. Þetta kemur fram í tilkynningu lögreglu.

„Á meðan unnið er að úrlausn er vettvangur lokaður og bæði Engjavegur og Tryggvagata þar með í allt að 100 metra fjarlægð frá gatnamótunum. Ekki er talið að fólki stafi hætta af hlutnum nú eftir að vettvangi hefur verið lokað. Nánari upplýsingar verða veittar eftir að aðgerðum lýkur.“

Fyrr í vikunni greindi lögreglan á Suðurlandi frá því að ungmenni á Selfossi væru að útbúa sprengjur og fikta með þær. Í fyrradag voru sprengjusérfræðingar á vegum ríkislögreglustjóra kallaðir út á Selfossi til að eyða heimagerðri sprengju, sem var ein nokkurra sem ungmenni í bænum höfðu undirbúið. Sprengjurnar voru að sögn lögreglu kraftmiklar og til þess fallnar að skapa verulega hættu.

Efnin sem notuð voru til að gera þær sprengjur fást í matvöruverslunum og hafa verslanir í bænum haft afskipti af börnum sem eru að koma og kaupa efni í sprengjurnar. Lögregla sagði í samtali við Vísi að vinsælt væri að taka mynd af sprengju-athæfinu. Það sé ágætt fyrir lögreglu að hafa brotin svona á upptöku.